മാസ്റ്റർപീസ്

കേരളത്തിലെ ആദ്യകാല ആർക്കിടെക്ട് സി. എസ്. മേനോൻ നവതിയുടെ നിറവിൽ

- സോന തമ്പി

ഒരു നഗരത്തിന്റെ വ്യക്തിത്വം അവിടത്തെ പ്രതീകാത്മകമായ കെട്ടിടങ്ങളാണ്. അങ്ങനെ കണക്കാക്കുമ്പോൾ സി. എസ്. മേനോൻ എന്ന ആർക്കിടെ പ്രതിഭാസം തൃശൂരിന്റെ ചരിത്രമാണ്. കാരണം, സാംസ്കാരിക നഗരത്തിന്റെ ആകാശരേഖകളിൽ സി. എസ്. മേനോൻ രൂപകല്പന ചെയ്ത കെട്ടിടങ്ങൾ വാനോളമുണ്ട്. അതിൽ ക്ഷേത്രങ്ങളും ദേവാലയങ്ങളും ആശുപത്രികളും കോളജുകളും യൂണിവേഴ്സിറ്റിയും അപാർട്മെന്റ് ബ്ലോക്കുകളും വീടുകളും തുടങ്ങി എണ്ണിയാലൊടുങ്ങാത്ത നിർമിതികളുണ്ട്.

 പാറമേക്കാവ് ക്ഷേത്രത്തിന്റെ കിഴക്കേ ഗോപുരം, തിരുവമ്പാടി ക്ഷേത്രത്തിലെ നാലമ്പലം, കാലടിയിലെ ശങ്കരാചാര്യ സ്തൂപം, കാർഷിക സർവകലാശാല, കലാമണ്ഡലം കൂത്തമ്പലം തുടങ്ങി ഇന്ത്യയിലെ ഏറ്റവും ഉയരം കൂടിയ ബൈബിൾ ടവർ വരെ നീണ്ടുകിടക്കുന്നു ആ ശില്പ സൗന്ദര്യം...

 കേരളത്തിലെ ആദ്യകാല ആർക്കിടെക്ചർ അധ്യാപകൻ കൂടിയായ മേനോൻ സാറിന്റെ ശിഷ്യഗണങ്ങളാണ് ഇന്നത്തെ പല പ്രമുഖ സീനിയർ ആർക്കിടെക്ടുമാരും.

നവതിയുടെ നിറവിൽ നിൽക്കുന്ന സി. എസ്. മേനോൻ ഈയടുത്തുവരെ പ്രോജക്ടുകൾ രൂപകല്പന ചെയ്തിരുന്നു. ഓരോ പ്രോജക്ടിനു പിറകിലുമായി പറഞ്ഞുതീരാത്തയത്ര കഥകളുടെ കൂമ്പാരം തന്നെ ഈ മനസ്സിലുണ്ട്, അതും ഓർമകൾക്ക് കോട്ടം തട്ടാതെ

 ആർക്കിടെക്ചറിനെ ലളിതമായി എങ്ങനെ നിർവചിക്കും?

 പാശ്ചാത്യരാണ് നിർമാണകലയെ ഒരു ശാസ്ത്രമാക്കി മാറ്റിയത്. ആർക്കിടെക്ചർ എന്നത് പ്ലാനിങ് മാത്രമാണ്. അതിനെ സ്ട്രക്ചറിലേക്ക് മാറ്റുന സിവിൽ ജിനീയർമാരും. ലോക പ്രശസ്ത ആർക്കിടെക്ട് ലേ കോർബൂസിയറുടെ പ്ലാനിങ് അല്ലേ ചണ്ഡീഗഡ് നഗരം

62 വർഷത്തെ അനുഭവസമ്പത്തിലേക്ക് തിരിഞ്ഞുനോക്കുമ്പോൾ...