കാഴ്ച കൂട്ടും മുട്ട കാശും തരും

ഡിസൈനർ മുട്ടകളിലൂടെ നേട്ടമുണ്ടാക്കാൻ അവസരം

- 

വീട്ടിലേക്കു കോഴിമുട്ട വാങ്ങുന്നതും ഹോട്ടലിലേക്കോ ബേക്കറിയിലേക്കോ കേറ്ററിങ്ങിനോ മുട്ട വാങ്ങുന്നതും തമ്മിൽ എന്താണു വ്യത്യാസം? വീട്ടിലേക്കു വാങ്ങുന്നത് ബ്രൗൺ മുട്ട, ഫൂഡ് ബിസിനസിനു വാങ്ങുന്നത് വെള്ളമുട്ട എന്നാവും മറുപടി. മുട്ടക്കോഴികളെ വളർത്തി വരുമാനം കണ്ടെത്തുന്നവരോടാണ് അടുത്ത ചോദ്യം. തമിഴ്നാട്ടിൽ നിന്നെത്തുന്ന വെള്ള മുട്ടകളെക്കാൾ ബ്രൗൺ മുട്ടകൾക്ക് എന്താണു മെച്ചം? മുട്ടത്തോടിന്റെ നിറമാണോ മഞ്ഞക്കരുവിന്റെ നിറമാണോ പോഷകസാന്നിധ്യ സൂചകം?

ഗുണമേന്മയുള്ള മുട്ട

ഗുണനിലവാരമേറിയ നാടൻ മുട്ടയെന്ന പരിഗണനയലാണ് ബ്രൗൺ മുട്ട കൂടുതൽ വില കൊടുത്തു നാം വാങ്ങുന്നത്. എന്നാൽ, തൊടിയിൽ ഔഷധസസ്യങ്ങളുൾപ്പെടെ കൊത്തിത്തിന്നു വളരുന്ന നാടൻ കോഴിയുടെ മുട്ടയ്ക്കു തുല്യമാകുമോ കൂട്ടിൽ കൃത്രിമത്തീറ്റ തിന്നു വളരുന്ന കോഴിയുടെ ബ്രൗൺ മുട്ട? തോടിന്റെ നിറമല്ല, കോഴിയുടെ തീറ്റക്രമമാണ് മുട്ടയുടെ ഗുണനിലവാരം നിർണയിക്കുന്നത്.