ഉയരങ്ങളിലേക്കൊരു ഉത്തമ മാതൃക

വിയറ്റ്നാം ശൈലിയിലുള്ള കുരുമുളകുകൃഷി നടപ്പാക്കി എൺപതുകാരൻ

- 

ഉത്തമനായ കർഷകൻ കൃഷിയിലെ നൂതനാശയങ്ങൾക്ക് മുഖം തിരിഞ്ഞു നിൽക്കില്ലെന്നു തെളിയിക്കുകയാണ് കോട്ടയം പാമ്പാടി വട്ടുകുളത്തെ ഉത്തമൻ.

നാട്ടിലെമ്പാടും വിയറ്റ്നാം മോഡൽ കുരുമുളകുകൃഷി പരീക്ഷിക്കുമ്പോൾ അടങ്ങിയിരിക്കാൻ അദ്ദേഹത്തിനായില്ല. വീടിനോടു ചേർന്നു റബർ വെട്ടിമാറ്റിയ 20 സെന്റ് ഭൂമിയിൽ പിവിസി പൈപ്പുകൾ നാട്ടി അദ്ദേഹവും അതു പരീക്ഷിച്ചു.

എഴുപത്തെട്ടാം വയസ്സിൽ തുടക്കമിട്ട പരീക്ഷണം എൺപതാം വയസ്സിൽ നിറയെ തിരിയിട്ടു വിജയത്തിലേക്ക് നീങ്ങുമ്പോൾ ഉത്തമൻ ചേട്ടനു മനം നിറയെ അഭിമാനം. പിവിസി കാലുകൾ നാട്ടുന്നതൊഴികെ ഏറക്കുറെ എല്ലാ ജോലികളും തനിച്ചു ചെയ്ത അദ്ദേഹത്തിന്റെ തോട്ടം കണ്ടാലറിയാം പരിചരണമികവ്. താങ്ങുകാലായി നാട്ടിയ പിവിസി പൈപ്പുകളുടെ ചുവടുഭാഗം മുതൽ നിറ യെ ശാഖകളുമായി പൊതിഞ്ഞു വളരുന്ന കുരുമുളകുവള്ളികൾ വേറിട്ട കാഴ്ചതന്നെ. ആദ്യ വിളവെടുപ്പിൽ ന്നെ ഒരു ചുവട്ടിൽനിന്ന് ഒരു കിലോയിലേറെ ഉണക്കമുളകാണു പ്രതീക്ഷിക്കുന്നത്. അടുത്ത മാസം വിളവെടുപ്പു നടത്താനാകും. എന്നാൽ, വ്യത്യസ്ത സമയങ്ങളിലെ പൂ വിടൽ മൂലം നേരത്തേ മൂപ്പെത്തിയ തിരികൾ പൊഴിഞ്ഞു തുടങ്ങിയിട്ടുണ്ട്. അവ പെറുക്കി ഉണങ്ങി സൂക്ഷിക്കുന്നു.