അകത്തളച്ചെടിവിപണിയിൽ താരശോഭയോടെ പ്രിൻസി

പൂന്തോട്ടമൊരുക്കി പരിപാലിച്ചു നൽകുന്നത് അനുബന്ധ സംരംഭം

- ജേക്കബ് വർഗീസ് കുന്തറ

എറണാകുളം, ആലിൻചുവട്, പറമ്പത്തുശ്ശേരി വീട്ടിൽ പ്രിൻസി ജേക്കബ് എന്ന വീട്ടമ്മ ഏഴു വർഷമായി ഇൻഡോർ പ്ലാന്റ്സ് വിപണനത്തിൽ വിജയം കൊയ്യുന്നു. കോവിഡ് കാലമെത്തും മുൻപേ അഗ്ലോനിമ, കലാത്തിയ എന്നിവയുടെ ഓൺലൈൻ വിപണനത്തിലൂടെ പ്രിൻസി ഈ രംഗത്തു കാലുറപ്പിച്ചിരുന്നു. ഭർത്താവ് ജേക്കബ് നൽകിയ ഒരു ലക്ഷം രൂപയായിരുന്നു മൂലധനം. വീട്ടിലെ സൗകര്യം ഉപയോഗപ്പെടുത്തി, മകളുടെ സഹായത്തോടെ ചെടികൾ പായ്ക്ക് ചെയ്ത് കുറിയർ വഴി അയച്ചു. ലാഭം കിട്ടിത്തുടങ്ങിയതോടെ അകത്തളത്തിൽ ഉപയോഗിക്കാവുന്ന സെറാമിക് ചട്ടികളുടെ ഓൺലൈൻ വിപണനവും ആരംഭിച്ചു. ചെറിയ സെറാമിക് ചട്ടികളിൽ നട്ട ഇൻഡോർ ചെടികൾ ജന്മദിനം, മാമ്മോദിസ തുടങ്ങിയ വിശേഷാവസരങ്ങളിൽ "ഗ്രീൻ ഗിഫ്റ്റ്' ആയി നൽകുന്ന രീതിക്കു പ്രചാരമേറിയതോടെ പ്രിൻസിയുടെ ബിസിനസ് പച്ചപിടിച്ചു.