അഡീനിയങ്ങളുടെ വീട്

14 സെന്റിൽനിന്ന് പതിനായിരങ്ങൾ വരുമാനം

- ജോബി ജോസഫ് തോട്ടുങ്കൽ

ഇരുപതിലേറെ വർഷങ്ങൾക്കു മുൻപ് പാലക്കാട് കോട്ടമൈതാനത്തു നടന്ന പുഷ്പമേളയിലാണ് അഡീനിയത്തെ ആദ്യമായി മുരളി പരിചയപ്പെടുന്നത്. വലിയ വടവൃക്ഷങ്ങളെപ്പോലെ വലുപ്പമേറിയ ചുവടുഭാഗവും ചില്ലകളിൽ നിറയെ പൂക്കളുമുള്ള, ബോൺസായ് പ്രകൃതമുള്ള ചെടിയിനം. ആദ്യ കാഴ്ചയിൽത്തന്നെ അതിനെ ഇഷ്ടമായി. ഒന്നിന് 50 രൂപ വീതം നൽകി 5 എണ്ണം വാങ്ങി. 20 വർഷത്തിനിപ്പുറം മുരളിയുടെ ജീവിതത്തിലെ നിറസാന്നിധ്യമാണ് അഡീനിയങ്ങൾ. വീടിന്റെ ടെറസ് നിറയെ പൂമെത്ത പോലെ പലനിറപ്പൂക്കൾ വിരിഞ്ഞു നിൽക്കുന്ന നൂറുകണക്കിന് വ്യത്യസ്ത അഡീനിയങ്ങൾ. മൾട്ടി ഗ്രാഫ്റ്റിങ്ങിലൂടെ ഒരു ചെടിയിൽത്തന്നെ ബഹുവർണങ്ങളിലുള്ള പൂക്കൾ. ഇത്തിരി മുറ്റം നിറയെ ഗ്രാഫ്റ്റ് ചെയ്ത് വിൽപനയ്ക്ക് തയാറാക്കിയ തൈകൾ. ഇത്ര വർഷങ്ങൾക്കു ശേഷവും അഡീനിയത്തോട് അഭിനിവേശം കൂടുകയല്ലാതെ കുറഞ്ഞിട്ടില്ലെന്ന്, പാലക്കാട് പൊൽപ്പുള്ളി കൂളിമുട്ടത്തുള്ള വീടിന്റെ ടെറസിൽ, നിറയെ പൂവിട്ടു നിൽക്കുന്ന അഡീനിയങ്ങൾ പരിചയപ്പെടുത്തി മുരളി പറയുന്നു.

സ്ഥിര വരുമാനം

കാഴ്ചസുഖം മാത്രമല്ല, കൈനിറയെ കാശും തരുന്നുണ്ട് ഈ പൂച്ചെടികൾ. അഡീനിയങ്ങളുടെ ഇനവും എണ്ണവും കൂടിയപ്പോഴാണ് 6-7 വർഷം മുൻപ് വിൽപനയിലേക്കു കട ന്നത്. കൗതുകത്തിനു വാങ്ങിയ 5 പൂച്ചെടികളിൽ നിന്നു വളർന്ന സംരംഭം ഇന്നു മാസം 15,000-20,000 രൂപ വരെ വരുമാനം നൽകുന്നു. വലിയ മുതൽമുടക്കു വേണ്ടാ, വിശാലമായ കൃഷിയിടം വേണ്ടാ, കൃഷിയന്ത്രങ്ങളും വേണ്ടാ. പൂച്ചെടികളോടുള്ള അഗാധ സ്നേഹം മാത്രമാണ് മൂലധനമെന്നു മുരളി.

ആരാമ സുന്ദരി