കാറ്റർപില്ലർ

വിപിൻ വേണുഗോപാലിന്റെ മിനി സിനിമ

- ജി. കൃഷ്ണൻ

ഒരു മണിക്കൂർ ദൈർഘ്യമുള്ള സിനിമകൾ ധാരാളമായി മലയാളികൾ കണ്ടിരിക്കുന്നത് ഹോളിവുഡ് സിനിമകളായിരിക്കും.

ഈ രീതി അവലംബിച്ചു കൊണ്ടാണ് വിപിൻ വേണുഗോപാൽ തന്റെ പുതിയ സിനിമയുമായി വരുന്നത്. മിനി സിനിമ എന്ന ലേബലിൽ ഒരു മണിക്കൂർ സമയം കൊണ്ട് കണ്ടുതീർക്കാവുന്ന ഒരു കൊച്ചു സിനിമ.

"കാറ്റർപില്ലർ.

ഇതാണ് ആ സിനിമയുടെ പേര്. "കാറ്റർപില്ലർ' എന്നുവച്ചാൽ "ചിത്രശലഭപ്പുഴു എന്നാണ് പേര്. ഈ പേരും കഥാസന്ദർഭങ്ങളുമായി ഇഴുകി ചേരുന്ന മുഹൂർത്തങ്ങൾ പലപ്പോഴും സിനിമയിൽ കടന്നു വരുന്നുണ്ട്.

സ്വപ്നത്തിൽ നിന്നും പ്രചോദനം ഉൾക്കൊണ്ട്

സംവിധായകൻ വിപിൻ വേണുഗോപാൽ മലയാളിയാണ്. തൃശൂരാണ് സ്വദേശം. വളർന്നതും പഠിച്ചതും ചെന്നൈയിൽ. പിൽക്കാലത്ത് ലണ്ടനിലേയ്ക്ക് ചേക്കേറി. ഇപ്പോൾ സെറ്റിലായിരിക്കുന്നത് അവിടെയാണ്. ഇതിനോടകം ചില ഷോർട്ട് ഫിലിമുകൾ ലണ്ടനിൽ വച്ച് ഷൂട്ടു ചെയ്തിട്ടുണ്ടങ്കിലും കാറ്റർപില്ലർ കേരളാന്തരീക്ഷത്തിൽ ചിത്രീകരിക്കേണ്ട ഒരു കഥയായതുകൊണ്ടാണ് കൊച്ചിയിലെത്തിയതെന്ന് വിപിൻ പറ ഞ്ഞു.