കെട്ടുകഥകൾക്കപ്പുറത്തെ ജീവിതം

തിരുവല്ലക്കാരി ഡയാനയിൽ നിന്ന് നയൻ താരയെന്ന താരറാണിയിലേക്ക് ഡോക്യുമെന്ററി പറഞ്ഞുവയ്ക്കുന്നത് എന്ത്?

- അപ്പൂസ് കെ.എസ്

മലയാളത്തിൽ അരങ്ങേറി തമിഴ്, തെലുങ്ക്, കന്നഡ ചിത്രങ്ങളിലൂടെ തെന്നിന്ത്യൻ സിനിമയിൽ താരറാണിയായി മാറിയ നായികയാണ് നയൻതാ ര. ലേഡി സൂപ്പർസ്റ്റാർ എന്ന് ആരാധകർ വിളിക്കുന്ന ഈ താരസുന്ദരി ഇന്ത്യൻ സിനിമയിൽ ഏറ്റവും കൂടുതൽ പ്രതിഫലം വാങ്ങുന്ന നായികമാരിൽ ഒരാളാണ്. ഇപ്പോഴിതാ താരത്തിന്റെ ജീവിതത്തെ ആസ്പദമാക്കിയുള്ള ഡോക്യുമെന്ററി ഫിലിം ആയ നയൻതാര ബിയോണ്ട് ദി ഫെയറി ടെയിൽ പുറത്തിറങ്ങിയിരിക്കുന്നു. ഡോക്യുമെന്ററിയിൽ ഉപയോഗിച്ച ദൃശ്യങ്ങളുമായി ബന്ധപ്പെട്ട വിവാദങ്ങൾ നില നിൽക്കെയാണ് ഇതിന്റെ റിലീസ്. ഡോക്യുമെന്ററിയിൽ ഉപയോഗിച്ച ദൃശ്യങ്ങളെച്ചൊല്ലി ധനുഷും നയൻതാരയും തമ്മിൽ കഴിഞ്ഞ കുറച്ചുദിവസങ്ങളായി സാമൂഹിക മാധ്യമങ്ങ ളിലും നിയമവഴിയിലും കൊമ്പു കോർക്കുകയാണ്. ഇതിനിടെയാണ് ഡോക്യുമെന്ററിയുടെ റിലീസും. സിനിമയെന്ന വലിയ വ്യവസായത്തിന്റെ ഒരറ്റത്തെ ചെറിയൊരു ബിന്ദു മാത്രമായിരുന്ന തിരുവല്ലക്കാരി ഡയാന മേരി കുര്യൻ എന്ന നയൻതാര അതേ വ്യവസായത്തിന്റെ കേന്ദ്ര ബിന്ദുവിലെത്തിയത് ചില്ലറ കാര്യമല്ല. അവസരങ്ങളെ തേടി പിടിച്ച് വിനിയോഗിച്ച് പടത്തുയർത്തിയതാണ് അവർ ആ സാമ്രാജ്യം. 40-ാം പിറന്നാൾ ആഘോഷിക്കുമ്പോൾ നയൻസ് തന്റെ പിന്നിൽ തീർത്ത ചരിത്രം ഇന്ത്യൻ സിനിമയിലെ സുവർണ്ണരേഖയാണ്. ആർമി ഉദ്യോഗസ്ഥനായ കുര്യന്റെയും ഓമന കുര്യന്റെയും മകളായി 1984 ലാണ് നയൻ താരയുടെ ജനനം. ഗുജറാത്ത്, തിരുവല്ല എന്നിവിടങ്ങളിലായിട്ടായിരുന്നു പഠനം. പഠനത്തിൽ മിടുക്കിയായിരുന്ന നയൻതാര ചാർട്ടേഡ് അക്കൗണ്ടന്റാവാനാണ് ആഗ്രഹിച്ചിരുന്നത്. പഠനത്തോടൊപ്പം മോഡലിംഗിലും മികവ് പുലർത്തി. നിരവധി പ്രമുഖ മത്സരങ്ങളിലും മികച്ച വിജയം നേടാനായി. ശേഷം ടെലിവിഷൻ അവതാരകയുമായി. അതിനിടയിലാണ് മനസ്സിനക്കരെ എന്ന സിനിമയിലേക്ക് നയൻസ് എത്തിപ്പെടുന്നത്.