இந்தியாவின் PEACE....பீஸ் பீஸா..?

இதென்ன 'குங்குமம்' வார தழில் அடிக்கடி அமைதியான நாடு எது... பணக்கார நாடு எது... ஏழ்மையான நாடு எது... என்ற பட்டியல் இடம்பெறுகிறது என்று நீங்கள் கேட்கலாம்.

- ஜான்சி

தினமும் காலையில் ஃபாஸ்ட்டை பிரேக் செய்கிறோம் அல்லவா..? இட்லி, தோசை அல்லது பழைய சோறு என மார்னிங் சாப்பிடுகிறோம் அல்லவா..? எதற்காக?

இரவு முழுக்க வயிறு காலியாக இருக்கிறது... காலையில் சாப்பிட்டால்தான் அன்றைய தினம் புத்துணர்ச்சியுடன் வேலை பார்க்க முடியும் என்றுதானே?

அப்படித்தான் இந்தப் பட்டியலும்.

நம் நாடு எந்த இடத்தில் இருக்கிறது என்பதை அறிந்தால்தான் மேற்கொண்டு என்ன செய்து முதன்மையான இடத்தைப் பிடிக்கலாம் என்பதற்காகத்தான்.

ஏனெனில் இது நம் நாடு. நாம் தான் நாடு. நாம்தான் இந்த நாட்டை முன்னேற்ற வேண்டும்.

இந்த உண்மையின் அடிப்படையில் தான் இந்த வாரம் அமைதியான நாடுகளின் பட்டியல். சில மாதங்களுக்கு முன் ஒரு பட்டியல் வெளியானதே என்று கேட்கலாம். அது வேறு நிறுவனம் வெளியிட்ட பட்டியல்... இது வேறு நிறுவனம் வெளியிட்டுள்ள பட்டியல். ரைட். விஷயத்துக்கு வரலாம். 2025ம் ஆண்டிற்கான உலகின் அமைதியான நாடுகள் பட்டியல் இப்போது வெளியாகியுள்ளது. அதில் வழக்கம்போல டாப் இடங்களில் ஐரோப்பிய நாடுகளே ஆதிக்கம் செலுத்துகின்றன.

ஐஇபி எனப்படும் பொருளாதார மற்றும் அமைதிக்கான நிறுவனம் ஒவ்வொரு ஆண்டும் உலகின் அமைதியான நாடுகள் பட்டியலை வெளியிடும். இந்த ஆண்டிற்கான அமைதிப் பட்டியல் இப்போது வெளியிடப்பட்டுள்ளது. உலக மக்கள் தொகையில் 99.7% உள்ளடக்கிய 163 நாடுகளை ஆய்வு செய்து இந்தப் பட்டியல் வெளியிடப்பட்டுள்ளது.

மூன்று முக்கிய துறைகளில் 13 விஷயங்களை ஆய்வு செய்து இந்த லிஸ்ட் உருவாக்கப்பட்டுள்ளது. சமூக பாதுகாப்பு, உள்நாட்டு மற்றும் சர்வதேச விவகாரம், இராணுவமயமாக்கலின் அளவு ஆகியவற்றை வைத்து இந்த லிஸ்ட் உருவாக்கப்பட்டுள்ளது.

இந்தாண்டும் இந்த லிஸ்ட்டில் வழக்கம்போல முன்பே சொன்னதுபோல் ஐரோப்பிய நாடுகளே முன்னிலையில் உள்ளன. டாப் 10ல் 8 நாடுகள் ஐரோப்பிய நாடுகளாகவே உள்ளன.

இதில் முதலிடத்தில் ஐஸ்லாந்து இருக்கிறது. ஐஸ்லாந்து தொடர்ந்து உலகின் மிகவும் அமைதியான நாடு என்ற பட்டத்தைத் தக்க வைத்துக் கொண்டுள்ளது.