பூத்பாபா மற்றும் பாதுஷா

கோடை விடுமுறைக்காக, சீக்கூ முயல் தனது தாத்தாவுடன் புங்கிதார் என்ற இடத்திற்கு சென்றான். அது கர்வாள மலைப் பகுதியில் இருந்தது. அங்கு, அவன் பிளாக்கி கரடியுடன் நண்பனானான்.

- குமுத் குமார்

ஒரு நாள், பிளாக்கி, சீக்கூவை மலைச் சாலைக்கு அழைத்து சென்றான். அவர்கள் ஒரு நதிக்கு மேல் கட்டப்பட்ட இரும்புப் பாலத்தை கடந்து, சிறிய மலை ஒன்றின் மேல் இருந்த ஒரு இனிப்பு கடையை அடைந்தனர்.

“சீக்கூ, இங்குள்ள இனிப்புகள் எல்லாம் புது புது சுவையாக இருக்கும். ஜேனா நரி தினமும் பாதுஷா, ஜிலேபி, ரசமலாய் எல்லாம் செய்கிறாள். இன்று, உனக்கு நான் பாதுஷா வாங்கித் தருகிறேன்,” என்றான் பிளாக்கி. சீக்கூ ஒரு பாதுஷாவை சாப்பிட்டவுடன், “அருமை பிளாக்கி! இந்த பாதுஷா சூப்பர் டேஸ்ட்ல இருக்கு! எனக்கு ரொம்ப பிடிச்சுப் போச்சு!” என்றான்.

“இதெல்லாம் தூய பாரம்பரிய நெய்யில் செய்யப்பட்டது. ருசிக்க மட்டுமல்ல, உடலுக்கும் நல்லது,” என்றான் பிளாக்கி.

“அப்படியா பிளாக்கி! அப்போ நான் நிறைய பாரம்பரிய நெய் பாதுஷா சாப்பிடணும்,” என்று சீக்கூ சிரித்துக் கொண்டு சொன்னான்.

சீக்கூ திருப்தியாக சாப்பிட்டான், ஆனாலும் அவனுக்குள் இன்னும் ஆசை குறையவில்லை. மறுநாள் காலையில் சீக்கூ மீண்டும் பாதுஷா சாப்பிட விரும்பினான். பிளாக்கி வீட்டிற்குப் போனான். ஆனால் பிளாக்கி தன் பண்ணை நிலத்தில் வேலை செய்யச் சென்றுவிட்டான். இப்போ என்ன செய்யலாம்?

சீக்கூ யாருக்கும் தெரியாமலே தனியாகப் போய்ப் பாதுஷா சாப்பிட முடிவு செய்தான்.

வெயில் காலமாக இருந்தாலும், அன்று காலை, மலை முழுக்க மேகங்கள் பரவி இருந்தன. சில மேகங்கள் பள்ளத்தாக்குக்குள் இறங்கியிருந்தன. ஆனாலும், பாதுஷா ஆசையை வெல்ல முடியாமல், சீக்கூ பயணத்தைத் தொடர்ந்தான்.

அவன் நடக்க ஆரம்பித்ததும் மழை தூறல் தொடங்கியது. பாதி தூரம் சென்றவுடன், பலமான காற்றோடு மழை கொட்ட ஆரம்பித்தது. மின்னலும் இடிமழையும் உண்டாகின.

அவன் முன்னால் ஒரு குகையைப் பார்த்தான். மழையிலிருந்து தற்காலிக பாதுகாப்புக்காக, சீக்கூ அந்தக் குகைக்குள் சென்றான்.

உட்புகுந்தவுடன், அவன் பார்த்த காட்சியால் பயந்து “ஆஹ்... ஈ... ஈ... ஒரு ப...ப...பூதம்!” என்று கத்தினான்.

ஓட முயற்சித்தபோது பயத்தில் மயங்கி விழுந்தான். மயக்கம் தெளிந்ததும், அவன் மெதுவாக ஒரு கண்ணை திறந்தான். அப்போது அந்த பூதம் அவனை பராமரிப்பதைப் பார்த்தான்.