മീൻചട്ടിയിലെ രുചിക്ക്സർത്ത്

അന്നുമുതൽ ഇന്നുവരെ ഇവർ തന്നെയാണ് ഇവിടെ പാചകം ചെയ്യുന്നത്, ഒരേ രുചിക്കൂട്ടിൽ

- 

മീൻചട്ടി ഈ പേര് കേൾക്കാത്ത, ഇവിടുത്തെ മീൻ വിഭവങ്ങൾ കഴിക്കാത്ത കൊച്ചിക്കാർ ഉണ്ടാവില്ല. കാരണം അത്രയേറെ ഫേമസാണ് ഇവിടുത്തെ മീൻ രുചികൾ. മീൻ വിഭവങ്ങൾക്ക് മാത്രമായി ഒരു കട. സാധാരണക്കാരുടെയും സെലിബ്രിറ്റികളുടെയുമൊക്കെ ഇഷ്ടഭക്ഷണശാല. വെളിയത്തുനാട് സ്വദേശിയായ അബ്ദുൾ കലാം ആസാദ് ആണ് മീൻചട്ടിയുടെ അമരക്കാരൻ.

2018വരെ വണ്ടി കച്ചവടവും വർക്ക്ഷോപ്പ് ബിസിനസുമായി കഴിഞ്ഞിരുന്ന അബ്ദുൾ കലാമിന്റെ ജീവിതത്തിൽ കരിനിഴൽ വീഴ്ത്തിയത് വെള്ളപ്പൊക്കമായിരുന്നു. സാമ്പത്തികമായി നഷ്ട ത്തിലായ കലാമിനെ, കൊറോണ കാലം വീണ്ടും തളർത്തി. ബിസിനസ് തകർന്നതോടെ എന്ത് ചെയ്യണമെന്ന് അറിയാതെ അനിശ്ചിതത്തിലായ വർഷങ്ങൾ... പട്ടിണി മുന്നിൽകണ്ട് ചൂണ്ടയും എടുത്ത് പുഴയിലേക്ക് ഇറങ്ങി. പട്ടിണി മാറ്റാനാണ് പോയി തുടങ്ങിയെങ്കിലും പിന്നീട് ഇതൊരു ഉപജീ വനമാർഗം ആക്കിക്കൂടെ എന്ന ചിന്തയുണ്ടായി. ആവശ്യമുള്ളത് വിട്ടിലേക്ക് പാകം ചെയ്യാനും ബാക്കിയുള്ളത് വിൽക്കാനും തുടങ്ങിയപ്പോഴാണ്, ഇതിനുള്ളിലെ ബിസിനസ് സാധ്യത തിരിച്ചറിഞ്ഞു തുടങ്ങിയത്. അങ്ങനെയാണ് 2021 ഡിസംബറിൽ, കളമശ്ശേരിയിൽ ആദ്യത്തെ ഔട്ട്ലറ്റ് തുറന്നത്.