ഒടുവിൽ പ്രവീൺ സ്റ്റാറായി പവർ സ്റ്റാർ

തകർന്നു, തളർന്നു, പ്രതിരോധിച്ചു

- 

കനൽചൂട്  നൽകിയ സൂര്യൻ അസ്തമിക്കുന്നു. കണ്ണെത്താദൂരത്തോളം പരന്നു കിടക്കുന്ന പാടത്തിനരികിൽ കലങ്ങിയ കണ്ണുകളോടെ പ്രവീൺ നിന്നു. പ്രവീൺ അങ്ങനെയാണ്. സങ്കടം സഹിക്കാതെയാൽ പാടത്തേക്കിറങ്ങും. മതിയാകും വരെ കരയാം.ആരും കാണില്ല.പക്ഷെ ഇന്നത്തേതിന് ഒരു പ്രത്യേകത ഉണ്ട്. ജീവിതം ഒരു കാരണവശാലും മുന്നോട്ട് പോകില്ലെന്ന് ഉറപ്പാക്കിയ ദിവസം. നിമിഷങ്ങൾക്കുള്ളിൽ ജീവിതം ഇരുളിലേക്കമരും. നാടാകെ ലക്ഷങ്ങളുടെ കടം. ഭാര്യയുടെ താലിമാല വരെ വിറ്റു. ഇനി വിൽക്കാനൊന്നുമില്ല. കടം മേടിച്ചവരുടെ ഒരു പട ഏതു നിമിഷവും വീട്ടിലേക്ക് എത്താം. എല്ലാം നഷ്ട്ടപെട്ടവനെ പോലെ നിന്ന പ്രവീണിന്റെ പിന്നിൽ ഒരു കാൽ പെരുമാറ്റം. തിരിഞ്ഞു നോക്കി, ഞെട്ടിപ്പോയി. പിറകിൽ അമ്മ സുഭദ്ര. ദൈവമേ അമ്മക്ക് എന്തെങ്കിലും സംശയം തോന്നിയിട്ടുണ്ടാകു മോ? എല്ലാം ഉള്ളിലൊതുക്കിയായിരുന്നു പ്രവീണിന്റെ ഇന്നു വരെയുള്ള ജീവിതം. ഒരാളോടും ഒന്നും പറഞ്ഞിട്ടില്ല ഇത്രയും കാലം. പെട്ടെന്ന് അമ്മയെ കണ്ടപ്പോൾ ശബ്ദിക്കാനായില്ല. വാ തുറന്നതും പൊട്ടികരഞ്ഞുപോയി. എങ്ങലടിച്ചു കരഞ്ഞു പോയി. കൊച്ചുകുട്ടിയെ പോലെ... 'കുഞ്ഞുമോനേ, എന്താണ് നിന്റെ പ്രശ്നം. ദിവസങ്ങളായി ഞാൻ ശ്രദ്ധിക്കുന്നു'. പിടിച്ചു നിൽക്കാൻ സാധിച്ചില്ല പ്രവീണിന്. ഇത്ര കാലവും ഒരാളോടും പറയാതെ മനസ്സിൽ അടക്കിവച്ച സങ്കടങ്ങളുടെയും പെരുംകടങ്ങളുടെയും കെട്ടഴിച്ചു. എല്ലാം സങ്കടത്തോടെ കേട്ടുനിന്ന അമ്മ പറഞ്ഞു. നമ്മുക്കൊരു വീടുണ്ട്, സ്ഥലവുമുണ്ട്.ഇതെല്ലാം നമുക്ക് വിൽക്കാം. ഇതൊക്കെ വിറ്റാൽ നിന്റെ കടം തീരുമോ. നമ്മക്ക് വാടകയ്ക്ക് പോകാം. എത്രയോ ആളുകൾ അങ്ങനെ ജീവിക്കുന്നില്ലേ. വിഷമിക്കണ്ട. നീയൊരു ആൺകുട്ടിയല്ലേ '. പത്തുമാസം ചുമന്നു പ്രസവിച്ച മകനിൽ അമ്മയ്ക്കു പൂർണ പ്രതീക്ഷ. കടങ്ങളുടെ നടുക്കടലിൽ വീണ പ്രവീണിന് അമ്മയുടെ വാക്കുകൾ നൽകിയത് പുതുജീവനായിരുന്നു. പ്രതീക്ഷയുടെ തിരിനാളമായി അമ്മയുടെ വാക്കുകൾ. വരാൻ പോകുന്ന പൂർണ ചന്ദ്രന്റെ നിലാവെട്ട് പ്രതീക്ഷയേകി പോക്കുവെയിൽ അവിടെമാകെ പരന്നു. ഇവിടെ നിന്നും തുടങ്ങുന്നു പ്രവീൺ എന്ന സംരംഭകന്റെ വളർച്ച.

പൊളിച്ചു കൊണ്ടു പോയ ആദ്യ സംരംഭം