மங்கலம் தருவாள் மங்களா தேவி!

மங்களூரின் பிரபலமான கோயில்களில் மங்களா தேவி கோயிலும் ஒன்று. நேத்ராவதி, குமாரதாரா மற்றும் பல்குனி நதிகள் கூடும் இடத்தில் அமைந்துள்ள இக்கோயில், முழுக்க முழுக்க கேரள பாணியில் அமைந்திருப்பது விசேஷம். அன்னை மங்களா தேவி இத்தலம் வந்தமர்ந்த வரலாறுதான் என்ன...?!

- இரா.திலிப்

ஒரு சமயம் ஹிரண்யாட்சன் எனும் அரக்கன் மக்களையும், தேவர்களையும் துன்புறுத்தி வந்ததால், அவனை மகாவிஷ்ணு வதம் செய்தார். ஹிரண்யாட்சனுக்கு விகாசினி என ஒரு மகள் இருந்தாள். தந்தையைக் கொன்றதால் அவளுக்கு மகாவிஷ்ணுவை கொல்லும் எண்ணம் மனதில் உருவானது. இதற்காக பிரம்மா மற்றும் சிவனை நோக்கிக் கடும் தவம் செய்தாள்.