Chandrika Weekly Magazine - 2023 February 25

In this issue

കാലമേഘത്തിന്റെ കരിപ്പടര്‍പ്പില്‍ നിന്നും ജ്ഞാനത്തിന്റെ തെളിമയുമായി ചന്ദ്രിക ആഴ്ചപ്പതിപ്പ് ഒരിടവേളയ്ക്ക് ശേഷം വായനക്കാരുടെ കൈകളില്‍ വീണ്ടുമെത്തുകയാണ്. സാമ്രാജ്യത്വവിരുദ്ധ പോരാട്ടങ്ങളിലൂടെയും സ്വാതന്ത്ര്യ സമരത്തിന്റെ കനല്‍ വഴികളിലൂടെയുമാണ് ഇന്ത്യന്‍ മുസ്‌ലിംകള്‍ ദേശീയ ധാരയിലേക്ക് പൊരുതിക്കയറിയത്. സമുദായത്തിന്റെ ജ്ഞാനഭൂമികയില്‍ ഇരുള്‍ പരക്കാതിരിക്കാനാണ് എട്ടുപതിറ്റാണ്ട് മുമ്പ് ചന്ദ്രികയ്ക്ക് മഹാരഥന്മാരായ നേതാക്കള്‍ രൂപം നല്‍കിയത്. ബാഫഖി തങ്ങളും സീതി സാഹിബും സി.എച്ചും തീര്‍ത്ത വഴികളിലൂടെയാണ് അതിന്റെ പ്രയാണം. 'ഇതര സമുദായങ്ങളുമായി ഒരു പാലം പണിയുന്നതിനാണ്' ചന്ദ്രിക ആഴ്ചപ്പതിപ്പ് എന്ന് സി.എച്ച് ആവര്‍ത്തിച്ചിരുന്നു. ആ വാക്കുകള്‍ അന്വര്‍ത്ഥമാക്കുന്നതിലും പുത്തന്‍ എഴുത്തുകാരെ കണ്ടെത്തി പ്രോത്സാഹിപ്പിക്കുന്നതിലും ബഹുദൂരം മുന്നിലാണ് ആഴ്ചപ്പതിപ്പ്. ഇതിന്റെ തിരുമുറ്റത്ത് പിച്ചവെച്ചവരാണ് മലയാളത്തിലെ ലബ്ധപ്രതിഷ്ഠരായ എഴുത്തുകാരില്‍ ഏറിയപങ്കും. അഭിമാനത്തോടെ ആ യാത്ര തുടരുകയാണ്.