RECYCLING UPCYCLING THRIFTING ഇതാണ് ട്രെൻഡ്

മിസ് യൂണിവേഴ്സ് മത്സരത്തിന്റെ പതിനൊന്ന് എഡിഷനുകളുടെ അണിയറ പ്രവർത്തക ന്യൂയോർക്കിൽ ഫാഷൻ ട്രെൻഡുകളിൽ ഗവേഷണം നടത്തുന്ന സ്റ്റൈലിസ്റ്റ്- സഞ്ജന ജോൺ

- ബൈജു ഗോവിന്ദ്

പാരിസിലേയും മിലനിലേയും റാംപുകളിൽ പാറി നടന്നിരുന്ന ഫാഷൻ ഡിസൈനർ സഞ്ജന ജോൺ 2026ൽ പുതിയ തലമുറയിലെ പ്രതിഭകളെ രാജ്യാന്തര വേദിയിലേക്കു ക്ഷണിക്കുകയാണ്. 2026ൽ സിനിമാ മേഖലയിലേക്കു കാൽവയ്ക്കുന്നതിനൊപ്പം "വി ആർ ദ് ന്യൂ വേൾഡ്' എന്ന ടൈറ്റിലിൽ വിവിധ രാജ്യങ്ങളിലൂടെ സംഗീത യാത്രയും ആരംഭിക്കുന്ന ത്രില്ലിലാണ് മലയാളിയായ സഞ്ജന. “ഇന്ത്യയിലെ മൂന്നു നഗരങ്ങളിൽ ഓഡിഷൻ നടത്തും. ഹോളിവുഡിലെ പ്രമുഖർ അതിഥികളായി എത്തുന്ന സംഗീതയാത്രയിൽ എല്ലാവർക്കും പങ്കെടുക്കാം.

ഹിന്ദി സൂപ്പർസ്റ്റാർ സൽമാൻ ഖാന്റെ പിറന്നാൾ ആഘോഷത്തിൽ പങ്കെടുക്കാൻ മുംബൈയിലേക്കു പോകുന്നതിനിടെയാണു വനിത'യുമായി സഞ്ജന സംസാരിച്ചത്. ജെൻ സി തലമുറയുടെ ഇഷ്ടങ്ങളെക്കുറി ച്ചു പറഞ്ഞുകൊണ്ട് പുതുവർഷത്തിൽ സംഭവിക്കാനിരിക്കുന്ന ഫാഷൻ ട്രെൻഡുകൾ ഓരോന്നായി സഞ്ജന വിശദീകരിച്ചു.

ഫാഷൻ മേഖലയിലെ മാറ്റങ്ങൾ

കൂടുതൽ വില കൊടുത്തു വാങ്ങുന്നതു മാത്രമാണു ലോകോത്തരമെന്നുള്ള സങ്കല്പങ്ങളിൽ നിന്ന് ആളുകൾ മാറി. വില കൂടിയ വസ്ത്രം ധരിച്ചാലേ ശ്രദ്ധ കിട്ടുകയുള്ളൂ എന്നൊരു ധാരണയുണ്ടായിരുന്നു. അതും മാറി. എത്തിക്കൽ - ഇക്കണോമിക്കൽ കോൺസപ്റ്റിലാണ് ഇപ്പോഴത്തെ ചെറുപ്പക്കാർ വസ്ത്രങ്ങൾ വാങ്ങുന്നത്. റീ സൈക്ലിങ്, അപ് സൈക്ലിങ്, ത്രിഫ്ടിങ് ഇതാണ് ഇപ്പോഴത്തെ ട്രെൻഡ്. ജനറേറ്റഡ് ജനറേഷന്റെ മേന്മയാണിത്. ഈ തിരിച്ചറിവിൽ നിന്നുകൊണ്ടാണ് പുതുവർഷത്തിലെ ഫാഷൻ ട്രെൻഡിനെ വിലയിരുത്തേണ്ടത്.

മോഡേൺ മലയാളി

കേരളത്തിന്റെ പ്രകൃതി ഹരിതാഭമാണ്. പച്ച നിറത്തിലുള്ള ബാക്ക് ഗ്രൗണ്ടിൽ കോൺട്രാസ്റ്റ് കളർ ഇണങ്ങും. വെസ്റ്റേൺ ഔട്ഫിറ്റ്സ് പരീക്ഷിക്കാവുന്നതാണ്. കടും നിറമുള്ള സ്കർട്ടുകൾ ട്രെൻഡ് ആകും. നമുക്ക് ആറു മാസം വേനൽക്കാലമാണ്. ചൂടിന് ഇണങ്ങുന്ന വസ്ത്രം തിരഞ്ഞടുക്കുക. ആണുങ്ങളുടെ ഫാഷൻ ഇതിൽ നിന്നു വ്യത്യസ്തമാണ്. മെട്രോ മെയ്ൽ എന്നൊരു കോൺസപ്റ്റ് രൂപപ്പെട്ടിട്ടുണ്ട്. ലൈറ്റ് ഫാബ്രിക്, ലിനൻ, കോട്ടൻ മെറ്റീരിയലുകളിൽ തിളങ്ങുന്നവരാണ് അവർ.