ചിരിപ്രസാദം

മിമിക്സ് പരേഡിന് ജന്മം നൽകിയ കലാകാരന്മാരിൽ ഒരാളായ കെ.എസ്. പ്രസാദ് ചിരിലോകത്ത് അരനൂറ്റാണ്ടു പൂർത്തിയാക്കുന്നു

- വിജീഷ് ഗോപിനാഥ്

മൂന്നാംക്ലാസിൽ പഠിക്കുമ്പോഴാണ് ആദ്യമായി സ്റ്റേജിൽ കയറാൻ ഒരവസരം കെ.എസ്. പ്രസാദിനു കിട്ടിയത്. അതു മിമിക്രി മത്സരത്തിനല്ല, ഡാൻസിനായിരുന്നു. ഉച്ചയ്ക്ക് രണ്ടു മണിക്കു മത്സരം. പക്ഷേ, സ്കൂളിലേക്ക് ഓടിപ്പിടഞ്ഞു ചെന്നപ്പോഴേക്കും കണ്ട കാഴ്ച- നൃത്ത സംഘത്തിലെ കുട്ടികൾ സ്റ്റേജിലേക്കു കയറുന്നു.

ആദ്യ വേദി തന്നെ അസാധു ആയതിന്റെ സങ്കടം മൂന്നാം ക്ലാസുകാരനെ നന്നായി നീറ്റി. പ്രസാദ് പിന്നെ, ജീവിതത്തിൽ ഒരു സ്റ്റേജിലും വൈകിയിട്ടില്ല. മിമിക്രിയെ കൂട്ടുപിടിച്ചു നാട്ടിലും വിദേശത്തുമായി അയ്യായിരത്തിലധികം വേദികളിൽ ചിരിയുടെ പൂരം നടത്തി. കോമഡിയമിട്ടിന്റെ വർണക്കാഴ്ചകളുമായി നാട്ടുകാരെ പൊട്ടിച്ചിരിപ്പിക്കാൻ തുടങ്ങിയിട്ട് 50 വർഷം കഴിഞ്ഞു. കൂടെയുള്ളവരൊക്കെ വഴിമാറിപ്പോയിട്ടും ചിരി തന്നെ മാറിപ്പോയിട്ടും പ്രസാദിന്റെ ചിരിക്കു മാറ്റു കുറഞ്ഞില്ല.

കെ.എസ്. പ്രസാദ് ഈ മേഖലയിൽ പലതിന്റെയും തുടക്കക്കാരനാണ്. ഇന്ത്യയിൽ ആദ്യമായി സെൻസർ ചെയ്ത് മിമിക്സ് പരേഡ് വിഡിയോ കസെറ്റ് പുറത്തിറക്കി, ടിവിയിൽ മിമിക്സ് കോമഡി പരിപാടിക്ക് തുടക്കമിട്ടു, ആദ്യമായി അമേരിക്കയിൽ മിമിക്രി അവതരിപ്പിക്കാൻ പോയ രണ്ടു പേരിൽ ഒരാൾ, ആദ്യമായി ഡാൻസും പാട്ടുമൊക്കെ ചേർത്ത് മിമിക്രി മെഗാഷോ സംഘടിപ്പിച്ചു, ഇപ്പോൾ കൊച്ചിൻ കലാഭവന്റെ സെക്രട്ടറി... അരനൂറ്റാണ്ട് കേട്ട കയ്യടിയുടെ ആരവം കൊച്ചിയിലെ വീട്ടിലിരുന്നു പ്രസാദ് ഓർത്തെടുത്തു. ചിരി വേദികളിലൂടെ ഒരു യാത്ര.

പകരക്കാരനായ ആദ്യ വേദി

“സെന്റ് അഗസ്റ്റിൻ സ്കൂളിൽ പഠിക്കുമ്പോഴേ മിമിക്രി മത്സരത്തിൽ പങ്കെടുക്കും. അന്നെനിക്ക് ഒരു കൂട്ടുകാരനുണ്ടായിരുന്നു. പോൾ മൈക്കിൾ. മിമിക്രിക്ക് ഒരു വർഷം എനിക്ക് ഒന്നാം സ്ഥാനം കിട്ടിയാൽ അടുത്ത വർഷം പോൾ മൈക്കിളിനായിരിക്കും. സ്കൂളിൽ നിന്നിറങ്ങിയിട്ടും ഞങ്ങൾ രണ്ടും മിമിക്രി വിട്ടില്ല. പോൾ മൈക്കിളിനെ നിങ്ങളറിയും സംവിധായകനും നടനുമായ ലാൽ.