BE കൂൾ

ഒക്ടോബർ 10 ലോക മാനസികാരോഗ്യ ദിനം മനസ്സു കൈവിടാതെ കാക്കാനും സമ്മർദത്തോടു 'കടക്കു പുറത്ത് എന്നു പറയാനും നമുക്കു കൈകോർക്കാം

- രൂപാ ദയാബ്ജി

കൊല്ലത്തു നടന്ന സംഭവ മാണ്. ഭാര്യയും നാലു വയസ്സുള്ള മകനുമായി സന്തോഷകര(?)മായി കഴിഞ്ഞ സുധിൻ (യഥാർഥ പേരല്ല) ഒരു ദിവസം അപ്രത്യക്ഷനായി. ഫോൺ സ്വിച്ചോഫ് എന്ന പരാതിയോടെയാണു ഭാര്യ സുഹൃത്തുക്കളെ വിളിച്ചത്. അന്വേഷണത്തിനൊടുവിൽ വാരണസിയിൽ നിന്നു സുധിനെ കണ്ടെത്തി.

തിരികെ വരുന്നില്ല എന്നറിയിച്ച് അയാൾ ഭാര്യയ്ക്ക് ഇങ്ങനെ കത്തെഴുതി, “ജോലിയിലെ സമ്മർദം താങ്ങാനാകുന്നില്ല, വീട്ടിലും സമാധാനമില്ല. ക്രെഡിറ്റ് കാർഡ് ബില്ല് പേടിച്ചാണ് ഓരോ ദിവസവും തള്ളിനീക്കുന്നത്. ഭാരങ്ങളെല്ലാം താങ്ങി മനസ്സു പിടിവിട്ടു പോകുന്നു, സോറി...

" മാനസികാരോഗ്യം രാഷ്ട്രത്തിന്റെ സാമ്പത്തിക പുരോഗതിക്കു സുപ്രധാനമാണെന്ന് ഇന്ത്യൻ പാർലമെന്റ് ചർച്ച ചെയ്ത് അംഗീകരിച്ചത് അടുത്തിടെയാണ്. മാനസികാരോഗ്യം ഇത്രമാത്രം ചർച്ച ചെയ്യപ്പെടുന്ന കാലത്തും കാണാതെ പോകുന്ന സമ്മർദങ്ങളുണ്ടോ? വീടിനും ജോലിക്കും ബന്ധങ്ങളുടെ കെട്ടുകൾക്കുമിടയിൽ പെ ടാപ്പാടുപെടുകയാണോ പുരുഷൻ ? വിശദമായ മറുപടി കേൾക്കാം.

സാഹചര്യം മാറുന്നു.

ജീവിതത്തിലെ പുതുമയുള്ളതും പ്രയാസമേറിയതുമായ സാഹചര്യങ്ങളോടു പൊരുത്തപ്പെടാൻ ശരീരവും മനസ്സും നടത്തുന്ന പരിശ്രമങ്ങളുടെ ആകെത്തുകയാണു സമ്മർദം. ഒരു പരിധി വരെ കാര്യക്ഷമമായ പ്രവർത്തനത്തിനു പ്രചോദനമേകുന്നതു ചില സമ്മർദങ്ങളാണ്. എന്നാൽ പരിധി വിട്ടാൽ അതു വ്യക്തിയുടെ കാര്യശേഷിയെ തകർക്കും.

സ്ത്രീകളുടെ മാനസികാരോഗ്യത്തെ കുറിച്ചുള്ള ചർച്ചകൾ എല്ലാ കാലത്തും കാണാറുണ്ട്. ഗാർഹിക ഉത്തരവാദിത്തങ്ങളിൽ സ്ത്രീപുരുഷഭേദം ഇല്ലാതെ പാചകവും കുഞ്ഞുങ്ങളെ വളർത്തലും അടക്കമുള്ളവ പങ്കാളികൾ ഒരുമിച്ചു ചെയ്യുന്ന സാഹചര്യമാണ് ഇന്ന്. സ്വാഭാവികമായും സമാനമായ മാനസിക സമ്മർദം പുരുഷനും അനുഭവിക്കുന്നു എന്നർഥം.

പുരുഷൻ എല്ലാ പ്രതിസന്ധികളും ഒറ്റയ്ക്കു നേരിടാൻ പ്രാപ്തനായിരിക്കണം എന്ന ഈ തത്വം (toxic masculinity) സാഹചര്യങ്ങളെ സങ്കീർണമാക്കുന്നു. ആരോടും സഹായം ചോദിക്കാൻ പാടില്ല, കരയാൻ പാടില്ല, വേദനിക്കുന്നു എന്നു പരാതിപ്പെടാൻ പാടില്ല, നിസ്സാര രോഗങ്ങൾക്കു ചികിത്സ തേടാൻ പാടില്ല, മാനസിക പ്രശ്നങ്ങൾക്ക് ഒരു കാരണവശാലും ചികിത്സ എടുക്കാൻ പാടില്ല എന്നിങ്ങനെ പോകുന്നു ഇതിന്റെ സിദ്ധാന്തങ്ങൾ. അവ ലംഘിച്ചാൽ “നീ ആണാണോ' എന്നു ചോദിച്ചാകും സമൂഹം കളിയാക്കുക.