ഓണയാത്രയ്ക്ക് ഒരുങ്ങാം

സ്വയം തിരിച്ചറിയാനുള്ള അവസരമാണ് ഓരോ യാത്രയും സഞ്ചാരം ജീവിതത്തിന്റെ ഭാഗമാക്കിയ അഞ്ചു വനിതകളുടെ യാത്രാനുഭവം

- വിജു വി.വി.

സദ്യ പോലെ തന്നെ ഓണക്കാലത്തു മസ്റ്റ് ആണ് ട്രിപ്പും കുടുംബവുമൊത്തോ സോളോ ആയോ പോകാം. അതു യാത്രികരുടെ സൗകര്യവും ഇഷ്ടവും അനുസരിച്ചു തീരുമാനിക്കാം. പിന്നെ, പോകുന്ന സ്ഥലത്തേക്കുറിച്ചും കാണേണ്ട കാഴ്ചകളെ കുറിച്ചും അത്യാവശ്യ കാര്യങ്ങളൊക്കെ മനസ്സിലാക്കിയ ശേഷം ബജറ്റ് കൂടി കണക്കാക്കാം. അതിനു ശേഷം യാത്ര തീരുമാനിക്കാം.

പല മേഖലയും പോലെ ഒരുകാലത്ത് ആൺകോയ്മയുടെ ലോകമായിരുന്നു ട്രാവൽ ആൻഡ് ടൂറിസവും. എന്നാൽ, കാലത്തിന്റെ മാറ്റം ഇവിടെയും പ്രകടമായി. പർവതങ്ങൾ കീഴടക്കാനും സാഹസിക യാത്രകൾ ചെയ്യാനും സോളോ ട്രിപ് പോകാനും മികവാർന്ന അനുഭവങ്ങൾ പകർത്താനുമെല്ലാം വനിതകൾ കടന്നു വന്നു. ഇങ്ങനെ കടന്നു വന്നവരുടെ പ്രതിനിധികളായ അഞ്ചുപേർ അവരുടെ യാത്രാനുഭവങ്ങൾ പങ്കിടുകയാണിവിടെ.

അധ്യാപികയായ എൻ.പി. ദീപ, അഭിഭാഷക അന്ന ലിൻഡ ഈഡൻ, വന്യജീവി ഫൊട്ടോഗ്രഫർ സീമ സുരേഷ്, സാഹസികയാത്രികയും ട്രാവൽ ഓർഗനൈസറുമായ ജോളി ചെറിയാൻ, സാഹിത്യ പ്രവർത്തക മിനി സുരേഷ് എന്നിവർ അവരുടെ സഞ്ചാരകഥകൾ പങ്കിടുന്നു. ഒപ്പം ഓണായാത്രയ്ക്കായി അവർ നിർദേശിക്കുന്ന ഡെസ്റ്റിനേഷനുകളും.

ഉയരങ്ങളെ സ്നേഹിക്കുന്ന ഇംഗ്ലിഷ് ടീച്ചർ - എൻ.പി.ദീപ

ഇഗ്ലിഷ് അധ്യാപികയായി നിയമനം കിട്ടിയാണ് 13 വർഷം മുൻപു പെരിന്തൽമണ്ണയിൽ നിന്ന് എൻ.പി. ദീപ മലപ്പുറം ജില്ലയിലെ പാങ്ങ് ഗവ.ഹൈസ്കൂളിൽ എത്തിയത്. അവിടെയെത്തിപ്പോൾ കൂട്ടുകാരിയായി കിട്ടിയതാണു പാലക്കാട്ടുകാരി നിഷയെ രണ്ടു ടീച്ചർമാരും യാത്രപ്രേമികൾ.

അന്നു ചെറിയ കുട്ടിയായിരുന്ന മകൻ നിമയേയും നിഷയുടെ രണ്ടാൺമക്കളേയും കൂട്ടി രണ്ടുപേരും കൂടി വാൽപ്പാറയിലേക്ക് ഡ്രൈവ് പോയി. പിന്നെയും കേരളത്തിനകത്ത് ഒരുപാടു യാത്രകൾ. ഒരു വർഷം അങ്ങനെ കടന്നു പോയി. ദീപയ്ക്കു വീട്ടിനടുത്തുള്ള ആനമങ്ങാട് സ്കൂളിലേക്കു സ്ഥലംമാറ്റം കിട്ടി. കൂട്ടുകാരി ദുബായിൽ ഭർത്താവിനടുത്തേക്കും പോയി.

ഹിമവാന്റെ മുകൾത്തട്ടിൽ

യാത്രകളൊന്നുമില്ലാതെ ഒന്നര വർഷം കടന്നു പോയി. ഇതിനിടെയാണു ഞാൻ രാജൻ കാക്കനാടന്റെ ഹിമവാന്റെ മുകൾത്തട്ടിൽ എന്ന യാത്രാവിവരണ പുസ്തകം വായിക്കുന്നത്. അതിന്റെ ഓരോ പേജ് പിന്നിടുമ്പോഴും ഹിമാലയൻ യാത്ര നടത്തണമെന്ന മോഹം എന്റെയുള്ളിൽ ശക്തമായി.