പ്രിയാമണി ON DUTY

ഇരുത്തം വന്ന വാക്കുകളിൽ പ്രിയാമണിയുടെ തിരിച്ചറിവുകൾ

- ബൈജു ഗോവിന്ദ്

എരിവേനലിൽ മാനത്തു വിടരുന്ന മഴവില്ലു പോലെയാണു പ്രിയാമണി. പൊടുന്നനെ പ്രത്യക്ഷപ്പെട്ട് ആകാശത്തോളം ഉയർന്നു താരാപഥത്തിലങ്ങനെ തിളങ്ങി നിൽക്കും. മുംബൈയിൽ വെസ്റ്റ് അന്ധേരിയിലെ വീട്ടിലിരുന്നു പുത്തൻ വിശേഷങ്ങൾ പറയുന്ന സമയത്തും ഓർമകൾ ഏഴഴകിൽ പീലി വിടർത്തി.

“ഭാരതിരാജ, മണിരത്നം, ബാലു മഹേന്ദ്ര, രാംഗോപാൽ വർമ, രജിത് തുടങ്ങിയവരുടെ സിനിമകളിലൂടെ കടന്നുവരാൻ സാധിച്ചതു കൊണ്ടാണു നല്ല കഥാപാത്രങ്ങൾ തിരഞ്ഞെടുക്കാനുള്ള പക്വത എനിക്കു കിട്ടിയത്. ഒരു പ്രൊജക്ട് വരുമ്പോൾ അതിന്റെ എല്ലാ വശങ്ങളെക്കുറിച്ചും ആലോചിക്കും. സംവിധാനം, നിർമാണം, തിരക്കഥ, ക്യാമറ, നായകൻ എന്നിവയെല്ലാം എ പ്ലസ് ആകുമ്പോൾ പ്രേക്ഷകർക്കു പ്രതീക്ഷ ഉയരും. അതിനൊപ്പം കഥാപാത്രങ്ങൾ കോംപീറ്റ് ചെയ്തു നിൽക്കണം.

ഞാൻ അഭിനിയിച്ചിട്ടുള്ള ഒട്ടുമിക്ക സിനിമകളിലും ഈ വെല്ലുവിളി നേരിട്ടിട്ടുണ്ട്. പ്രശസ്ത സംവിധായകരുടെ സിനിമയിൽ അഭിനയിച്ചുവെന്നു മേനി പറയുകയല്ല. പുതിയ സംവിധായകരോടൊപ്പം വർക്ക് ചെയ്യുമ്പോൾ അവരുടെ മനസ്സിലെ കഥാപാത്രങ്ങളെ പൂർണതയിലെത്തിക്കാൻ മുൻപരിചയം സഹായമാകുമെന്ന തിരിച്ചറിവാണത്.'' ഇരുത്തം വന്ന വാക്കുകളിൽ പ്രിയാമണി പറയുന്നു.

വിവിധ ഭാഷകളിൽ വിവിധ നായകർ. ആരാണ് ഏറ്റവും പ്രിയപ്പെട്ട നായകൻ?

ഒറ്റ മറുപടിയേയുള്ളൂ, ഷാറുഖ് ഖാൻ. നടൻ മാത്രമല്ല, നന്മയുള്ള വ്യക്തിയുമാണ് അദ്ദേഹം. ജവാൻ എന്ന സിനിമയിൽ ഷാറുഖിന്റെ ഒപ്പം അഭിനയിച്ചപ്പോഴുണ്ടായ അനുഭവത്തിന്റെ വെളിച്ചത്തിലാണു പറയുന്നത്. സംവിധായകൻ ആറ്റ്ലിയാണ് എന്നെ വിളിച്ചത്. അതിനു മുൻപ് ഷാറുഖിന്റെ "ചെന്നൈ എക്സ്പ്രസ്' എന്ന സിനിമയ്ക്കു വേണ്ടി ഒരു ഗാനരംഗത്തിൽ ഡാൻസ് ചെയ്തിരുന്നു. ഷാറുഖിനൊപ്പം അഭിനയിക്കാനുള്ള അവസരവുമായി മറ്റൊരു വിളി വരുമ്പോഴുണ്ടായ സന്തോഷം പറയാനുണ്ടോ, അത്രമാത്രം എക്സൈസറ്റഡ് ആയിരുന്നു.

ഷാറുഖ് ഖാൻ ലൊക്കേഷനിൽ എത്തിയെന്നറിഞ്ഞയുടനെ ഞങ്ങൾ കാണാൻ ചെന്നു. അദ്ദേഹം എന്നെ പേരു വിളിച്ച് ഹഗ് ചെയ്തു. നെറ്റിയിൽ ചുംബിച്ചു സ്നേഹത്തോടെ പറഞ്ഞു, “താങ്ക് യു ഫോർ ഡൂയിങ് ദിസ് ഫിലിം നയൻതാര, ദീപിക പദുകോൺ, സന്യ മൽഹോത്ര എന്നിവരൊക്കെ ജവാനിലുണ്ട്. ഓരോരുത്തരേയും ചേർത്തു നിർത്തി നിങ്ങളെല്ലാം ആസാദിന്റെ ഗേൾസാണെന്ന് അദ്ദേഹം ഓർമിപ്പിക്കുമായിരുന്നു. ജവാനിൽ ഷാറുഖ് അവതരിപ്പിച്ച കഥാപാത്രത്തിന്റെ പേരാണ് ആസാദ്.