பக்தி மணம் கமழும் காஞ்சி மாநகரம்...!

காஞ்சி மாநகரம் என்று பெருமையுடன் காஞ்சிபுரம், பஞ்சபூத அழைக்கப்படும் திருத்தலங்களில் ஒன்று.புராதன சிறப்பு வாய்ந்த நகரம் ; நம் கலாசாரத்தையும் பாரம்பரியப் பெருமையையும் பறை சாற்றும் நகரம்; அவற்றை இன்றும் பாதுகாத்துக் கொண்டிருக்கும் நகரம்; சோழ, பல்லவ மன்னர்களால் சிறப்புடன் ஆட்சி செய்யப்பட்ட நகரம்; கட்டிடக்கலையிலும், சிற்பக்கலையிலும் மேன்மையுற்ற நகரம்; உலகமே பாராட்டும் பட்டுப்புடவைகளை உற்பத்தி செய்யும் நகரம்;கண்கவரும் காஞ்சிபுரப் பட்டுப் புடவைகளை விரும்பாத கன்னியரும் உண்டோ!

- மாலதி சுந்தரராஜன்

இப்படி பல விதங்களில் தலை நிமிர்ந்து நிற்கும் காஞ்சி மாநகரைக் காணும் ஆவலில் இந்த வருடம் ஜனவரி மாதம் ஒரு பயணம் மேற்கொண்டோம்.சென்னையில் ஒரு கல்யாணம். அது முடிந்து எங்களுக்குக் கிடைத்த இரண்டே நாட்களில் காஞ்சிபுரம் முழுவதும் பார்க்க ஆசை! ஆனால் அது பேராசை என்று கூறிவிட்டார் எங்களைக் கூட்டிக் கொண்டு போக வந்த நண்பர்! காஞ்சிபுரத் திலுள்ள கோவில்கள் அனைத்தையும் காண ஒரு மாதம் வேண்டும் என்றாரே பார்க்கலாம்! ஆகவே பிரசித்தி பெற்ற கோவில்கள் மட்டும் போக முடிவு செய்தோம். முதலில் நின்றது புகழ் வாய்ந்த ஸ்ரீஏகாம்பரேஸ்வரர் கோவில்!.

நமசிவாய வாழ்க, நாதன் தாள் வாழ்க.. என்று போற்றப்படும் தெய்வம்; எந்நாட்டவர்க்கும் இறைவனாக இருந்து அருள் பாலிக்கும் ஈசனின் பிரம்மாண்டமான உறைவிடம் ! பஞ்ச பூதங்களில் மண் வடிவமாக ஈசன் அமர்ந்து அருள் புரியும் புண்ணிய திருத்தலம்! இந்த மண்ணில் பிறக்கின்றோம்; இதனுடன் இணைந்து வாழ்கிறோம்; இறுதியில் நம்மை தாங்குவதும் இதே மண் தான்! மண் எனும் இம்மூலாதாரக் கருத்தை எடுத்துரைப்பது பிருத்வி லிங்கம் எனப்படும் ஸ்ரீஏகாம்பரேஸ்வர நாதர்!

நான்கு கம்பீரமான நுழை வாசல்கள்; அதற்கேற்றாற் போல் கம்பீரமான கோபுரங்கள்....பிரமிக்க வைக்கும் ராஜகோபுரம். கிருஷ்ண தேவராய மன்னனால் கட்டப்பட்டது என்கிறது குறிப்பு! உள்ளே நுழைந்தவுடன், அம்பாள் சிவபெருமானைத் தழுவிக் கொண்டிருக்கும் ஓவியம் நம்மை ஈர்க்கின்றது! அதுதான் இக்கோவிலின் வரலாறு!

ஒருமுறை பார்வதி தேவி சிவபெருமானின் கண்களை விளையாட்டாக பொத்தியதால், உலகம் இருளில் மூழ்க, கோபமுற்ற ஈசன் தேவியை பூலோகத்தில், காஞ்சியில் தவமிருக்கச் செய்தார். பார்வதியும் காஞ்சியில் உள்ள கம்பா நதிக்கரையில் ஒரு மாமரத்தின் அடியில் மணல் லிங்கம் செய்து பூஜித்தார்.தேவியின் தவத்தின் மகிமையை உலகுக்கு எடுத்துக் காட்ட, தன் சிரசின் மேல் அமர்ந்திருந்த கங்கையை வெள்ளமாகப் பாயச் செய்தார். உடனே பார்வதி தேவி மணல் லிங்கத்தை மார்புறத் தழுவிக் காத்தார்! இதைத்தான் அபிராமி பட்டர்,

செஞ்சேவகன் மெய்யடையக் கொங்கைக் குரும்பைக் குறியிட்ட நாயகி... என்று பக்தியுடன் குறிப்பிடுகின்றார்! அந்தக்குறி இன்றும் காணலாம்!தேவியின் மணலால் இச்செயலால் மனமகிழ்ந்த ஈசன்,அவருக்கு காட்சியளித்து, அவரைத் திருமணம் புரிந்து கொள்கிறார்!