நிஜத்திலும் நாங்கள் காதல் ஜோடி தான்! - ஹரிகா - அரவிஷ்

ஹரிகா எனும் சின்னத்திரை நடிகை மற்றும் அரவிஷ் சின்னத்திரை நடிகர். இவர்கள் இருவரும் லவ் - கம் - அரேன்ஜுடு மேரேஜ் செய்து கொண்டனர். இவர்களின் திருமணம் கோவையில் 27.03.2024-ல் இனிதே நடைபெற்றது.

- 

இவர்கள் ஒருவரை ஒருவர் நேசித்து திருமணம் செய்து கொண்டதைப் பற்றியும் சின்னத்திரையில் அவர்களின் நடிப்பின் அனுபவம் பற்றியும் மனம் திறந்து பேசினர். அவர்களின் தித்திக்கும் பேட்டி இதோ:

ஹரிகா.... உங்களைப் பற்றி....?

என் பெயர் ஹரிகா சாது. என் சொந்த ஊர் ஆந்திராவிலுள்ள அனந்தப்பூர். நான் பி.டெக் படித்துள்ளேன். என் அம்மா நாதமணி. அப்பா ஹரிநாத். இவர் ஒரு கிளாசிகல் டேன்சர். என் ஒரே தம்பி கல்லூரி படிப்பை முடித்துள்ளான். நடிப்பில் ஆர்வம் கொண்டுள்ளான்.

உங்கள் முதல் மீடியா என்ட்ரி எப்போது?

நான் கல்லூரியில் பி,டெக் படித்துக் கொண்டு இருந்த போதே டிக்-டாக் ஷோக்கள் செய்வேன். என் அப்பாவும் மீடியாவில் கிளாசிகல் நடனப் பயிற்றுனராக இருந்ததால் எனக்கும் திரைத் துறையில் நுழைந்திட விருப்பம் ஏற்பட்டது. சில போட்டோ ஆடிஷன்களுக்கும் சென்று இருந்தேன். அதில் கல்யாணி என்ற ஓர் தெலுங்கு சீரியலில் நடிக்கும் வாய்ப்பு ஏற்பட்டது. அச்சமயம் என் உடம்பு மிகவும் மெல்லியதாக இருந்தது.

2021-ல் சத்யஜோதி பிலிம்ஸின் திருமகள் சீரியலில் என்னை நாயகியாக நடிக்க தேர்ந்தெடுத்தனர். அச்சமயம் எனக்கு தமிழ் தெரியாது. டப்பிங்கில் தான் என் வசனம் பேசப்பட்டது. பிறகு கொஞ்சம் கொஞ்சமாக தமிழ் கற்றுக் கொண்டேன்.

பிடித்த - பிடிக்காத விஷயம் உண்டா?

ஹரிகா: பொதுவாக நேர்மையாக இருப்பதும் அப்படி இருப்பவர்களையும் எனக்கு மிகவும் பிடிக்கும். ருசியான உணவுகளை சாப்பிட பிடிக்கும். புறம் சொல்பவர்களை அறவே பிடிக்காது. கூடிய மட்டும் அப்படிப்பட்டவர்களின் நட்பை தவிர்ப்பேன்.

வெள்ளித்திரை அனுபவம்.....?

வெள்ளித் திரையில் நடிக்க வாய்ப்பு வந்த போது ஒப்புக் கொண்ட சீரியல்களில் நடிக்க டைம் ஷெட்யூல் காரணங்களால் என்னால் நடிக்க முடியாமல் போனது. நான் தெலுங்கில் கல்யாணி, ராவோயி சந்தமாமா மற்றும் பல சீரியல்களில் நடித்துள்ளேன். தமிழில் திருமகள் சீரியல் முடிந்ததும், மணமகளே சீரியலில் நாயகியாக நடித்து வருகிறேன்.