ஸ்ரீகிருஷ்ண ஜெயந்தி...

பூவுலகில் அதர்மம் எப்போது தலை தூக்குகிறதோ, அப்போது தர்மத்தை நிலைநாட்ட, கலியுக வரதனாக, கண்கண்ட தெய்வமாக,சிஷ்ட பரிபாலனாக, உலகளந்த உத்தமனாக ஸ்ரீமகாவிஷ்ணு அவதாரம் செய்கிறார்.

- மாலதி சுந்தரராஜன்‌

அதன்படி அவதரித்த ஸ்ரீகிருஷ்ணனின் அவதாரம், பகவானின் பத்து அவதாரங்களில் மிகவும் சுவாரசியம் நிறைந்த அவதாரம்!

ஒருத்தி மகனாய்ப் பிறந்து ஓரிரவில் ஒருத்தி மகனாய் ஒளித்து வளர... ஆம், சிறைச்சாலையில் தேவகிக்கு மகனாகப் பிறந்து, ஓரிரவில், அந்தகாரமான ரவில் கொட்டும் மழையில், பெருக் கெடுத்து ஓடும் யமுனைநதி வெள்ளத்தைக் கடந்து வேறு ஒருத்திக்கு மகனாய்ப் போய்ச் சேர்ந்து, எண்ணமும், சொல்லும், செயலும்,சர்வமும் நானே என்று உலகிற்கு எடுத்துரைத்த அற்புத அவதாரம்!

தர்மத்தின் நாயகனாக, உலகத்தை காக்கும் ரட்சகனாக, ஞானத்தின் இருப்பிடமாக, கார்மேனிச் செங்கண் கதிர்மதியம் போல் முகத்தான்... என்ற வர்ணனைக்கேற்ப, நீல மேக கருமை நிற மேனியில் காயாம்பூ வண்ணனாக ஒளி பொருந்திய கண்களுடன், பார்க்கப் பரவசப்படுத்தும் பேரழகுடன், சங்கு சக்ரம் ஏந்திய திருக்கரங்களுடன், ஆவணி மாதம் அஷ்டமித்திதியில் ரோகிணி நட்சத்திரத்தில் நடுநிசியில் ஆயர் குலத்தினிற் தோன்றிய அணி விளக்காக,அவதரித்தான் நவநீத கிருஷ்ணன்! ஸ்ரீகிருஷ்ண ஜெயந்தி!

கிருஷ்ண அவதாரம் மட்டும் தான் குழந்தை நிலை முதல் இறுதி நிலை வரை,வாழ்க்கையின் பல்வேறு நிகழ்வுகளை நிகழ்த்திக் காட்டி இதுதான் உலக வாழ்வு என்று ஒரு தெளிவை நமக்கு உரைக்கின்றது! தர்மமும், அதர்மமும் வாழ்வின் இரு பக்கங்கள் என்றாலும் இதில் வெற்றி பெறுவது தர்மமே என்பதை எடுத்துக் காட்டுகின்றது! இது தவிர நட்பு, பாசம், நேசம் போன்ற பல உயர்ந்த உணர்வுகளின் உறைவிடமாகத் திகழ்கின்றது! அதனால் தான் ஸ்ரீகிருஷ்ண அவதாரம் புண்ணிய அவதாரம் என்று போற்றப்படுகிறது!