പാതാളലോകത്തെ ജീവികൾ

ഇത്തരം മത്സ്യജീവികളെ subterranean fishes എന്നാണ് പൊതുവെ പറയുന്നത്

- ശ്രീപ്രസാദ് വടക്കേപ്പാട്ട് ഫോൺ : 9321102327

അച്ഛാ..... ദാ......... ബക്കറ്റിലിതാ ഒരു പാമ്പ്....

എന്തോ കണ്ട് പേടിച്ചതുപോലെയുള്ള കുട്ടന്റെ ഉച്ചത്തിലുള്ള ശബ്ദം കേട്ടാണ് അച്ഛൻ കിണറിനടുത്തേക്ക് വേഗം ചെന്നത്. ബക്കറ്റിൽ കോരിവച്ച വെള്ളത്തിലേക്ക് നോക്കിനിൽക്കുകയാണ് കുട്ടൻ. അതിലേക്ക് നോക്കിയപ്പോൾ അവൻ പറഞ്ഞത് ഏറെക്കുറെ ശരിയാണെന്ന് അച്ഛനും തോന്നി. കുട്ടൻ കിണറിൽ നിന്നും കോരിവച്ച വെള്ളത്തിൽ ഏതാനും സെന്റീമീറ്ററുകൾ മാത്രം നീളമുള്ള ചെറിയ പാമ്പിൻ കുഞ്ഞിനെ പോലെയുള്ള ഒരു ജീവി നീന്തിക്കളിക്കുന്നുണ്ട്.

“കുട്ടാ, ഇത് പാമ്പാണെന്ന് തോന്നുന്നില്ല. അതിന്റെ ആകൃതിയും നീന്തലുമൊ ക്കെ കണ്ടിട്ട് മത്സ്യത്തിന്റെ ലക്ഷണങ്ങൾ ഉണ്ട്. ബക്കറ്റിൽ നീന്തിക്കളിക്കുന്ന ജീവിയെ കുറച്ചുനേരം ശ്രദ്ധിച്ചു നോക്കിയതിനു ശേഷം അച്ഛൻ പറഞ്ഞു.

" എന്താ കുട്ടാ.... ഒരു ബഹളം?” കുട്ടന്റെ പേടിച്ചതു പോലെയുള്ള ശബ്ദമെല്ലാം കേട്ട് അയൽവാസിയായ വാസുമാമന്റെ വരവാണ്. വാസുമാമൻ കോളേജ് അദ്ധ്യാപകനാണ്. ജീവശാസ്ത്രമാണ് വിഷയം. അദ്ദേഹവും ബക്കറ്റിലെ ജീവിയെ സൂക്ഷിച്ചു നോക്കി.

“ഇത് പാമ്പൊന്നുമല്ല കുട്ടാ. മത്സ്യം തന്നെയാണ്. വാസുമാമനും അച്ഛൻ പറഞ്ഞതിനെ അനുകൂലിച്ചപ്പോൾ കുട്ടന് സംശയം വർദ്ധിക്കുകയാണ് ചെയ്തത്.

“കഴിഞ്ഞ വേനൽക്കാലത്തല്ലേ നമ്മുടെ കിണർ മുഴുവനും വറ്റിച്ച് ആൾമറയൊക്കെ പുതുക്കിപ്പണിതത്. പുതുക്കിപ്പണിത കിണറിൽ ആരും മത്സ്യത്തെ കൊണ്ടുവന്ന് ഇട്ടിട്ടില്ലെന്ന കാര്യവും ഉറപ്പാണ്. പിന്നെ അതിലെങ്ങനെ മത്സ്യം ഉണ്ടാകാനാണ്? കുട്ടൻ വാസുമാമന്റെ മുഖത്തേക്ക് സംശയത്തോടെ നോക്കി.

സംശയം ചോദിക്കാനുള്ള കുട്ടന്റെ വാസന അദ്ധ്യാപകനായ വാസുമാമനെ ഏറെ സന്തോഷിപ്പിച്ചു.

"ഇങ്ങനെവേണം കുട്ടികൾ. ചോദ്യങ്ങൾ ചോദിച്ച് സംശയങ്ങൾ ഇല്ലാതാക്കാനാണ് പരിശീലിക്കേണ്ടത്. അങ്ങനെ കിട്ടുന്ന ഉത്തരങ്ങൾ നമ്മൾ ഒരിക്കലും മറക്കില്ല. വാസുമാമൻ കുട്ടനെ തോളിൽത്തട്ടി അഭിനന്ദിച്ചു. അദ്ദേഹം അവന്റെ കൈപിടിച്ച് വീടിനടുത്തേക്ക് നടന്നു. അവരിരുവരും വീടിന്റെ കോലായയിൽ ഇരുന്നു. ശേഷം വാസുമാമൻ കുട്ടനോട് പറഞ്ഞതെല്ലാം അവൻ അതുവരെ കേൾക്കാത്ത ഒരു ജീവലോകത്തെക്കുറിച്ചും അവിടുത്തെ അന്തേവാസികളെക്കുറിച്ചുമാണ്.