ഈ ചന്ദ്രനിലൊക്കെ പോയിട്ടെന്തു കാര്യം?

ഗ്രഹങ്ങൾ എങ്ങനെ രൂപപ്പെടുന്നു എന്ന സംശയത്തിനുള്ള ശാസ്ത്രീയമായ തെളിവുകൾക്ക് അടുത്തെത്താൻ സാധിച്ചു

- ഡോ. പ്രശാന്ത് ജെ.പി. ഫോൺ: 9633445900

ആദ്യം തന്നെ പറയട്ടെ, ഇതൊരു പിന്തിരിപ്പൻ ചോദ്യമാണ്.

മനുഷ്യൻ സയൻസ് ഉപയോഗിക്കാൻ തുടങ്ങിയ കാലം മുതൽ കേട്ട് പഴകിയ ചോദ്യമാണിത്. എന്നിട്ടവർ മടുത്ത് പിന്തിരിഞ്ഞോടിയോ? ഇല്ല!! എന്താവും കാരണം? ഇക്കാണുന്ന രസം കൊല്ലിയായ സയൻസാണ് നമ്മുടെ ഈ രസമുള്ള ലോകത്തെ കെട്ടിപ്പടുത്തതെ ന്ന് ഒന്ന് ചിന്തിക്കുന്ന ഏവർക്കും മനസ്സിലാക്കാൻ കഴിയുന്ന കാര്യമാണ്. ഇന്ന് നമ്മൾ ചിന്തിക്കുന്ന സയൻസാണ് വർഷങ്ങൾക്കപ്പുറം നമ്മൾ കൊട്ടിഘോഷിക്കുന്ന ടെക്നോളജിയായി മാറുന്നത്. മറ്റു ചിലപ്പോൾ നമ്മുടെ ശാസ്ത്രീയാന്വേഷണങ്ങൾ മനുഷ്യജീവനെ തന്നെ നിലനിർത്താൻ വേണ്ടിയിട്ടുള്ളതായും മാറാറുണ്ട്.

ഇത്രയൊക്കെ ചെലവിട്ട് ചന്ദ്രനിലൊക്കെ പോയിട്ട് എന്ത് കാര്യം? എന്ന് ചോദിക്കുന്നവരെ കണ്ടിട്ടില്ലേ? അവരോട് മാക്സ് പ്ലാങ്ക് എന്ന ശാസ്ത്രകാരൻ പറഞ്ഞതാണ് നമുക്ക് കൊടുക്കാൻ കഴിയുന്ന ഏറ്റവും നല്ല മറുപടി.

“ഒരു പുതിയ ശാസ്ത്രീയ സത്യം തർക്കം മുഖേന എതിരാളികളെ വീഴ്ത്തിയല്ല വിജയിക്കുന്നത്. പകരം, ആ സത്യത്തെ നിരാകരിച്ചവരുടെ കാലശേഷം, അതിനെ മനസ്സിലാക്കാൻ ശേഷിയുള്ള ഒരു പുതുതലമുറ വരുമ്പോഴാണ് യാഥാർത്ഥ്യം അംഗീകരിക്കപ്പെടുന്നത്.

ഇന്ന് പ്രയോജനമില്ലെന്നു തോന്നുന്ന ശാസ്ത്രപഠനങ്ങൾ നാളെയുടെ സാങ്കേതിക വിപ്ലവങ്ങളുടെ അടിസ്ഥാനമായിത്തീരും. ഫലം ഇപ്പോൾ കാണാനാകുന്നില്ലെന്ന് പറഞ്ഞ് വിത്ത് വളരുന്നില്ലെന്ന് വിശ്വസിക്കരുതല്ലോ..? ഗ്രാവിറ്റിയെയും സമയത്തെയും കുറിച്ചുള്ള ഐൻസ്റ്റൈന്റെ സിദ്ധാന്തം ആദ്യം പരിചയപ്പെടുത്തിയപ്പോൾ അതിന് ദൈനംദിന ജീവിതത്തിൽ എന്ത് ഉപയോഗമെന്ന് പലർക്കും മനസ്സിലായില്ല. ഇന്ന് നമുക്ക് അനിവാര്യമായ GPS സിസ്റ്റം ശരിയായി പ്രവർത്തിക്കാൻ ഐൻസ്റ്റൈന്റെ സിദ്ധാന്തം നിർണായകമാണ്. സമയത്തിന്റെ വക്രത കണക്കിലെടുക്കാതെയുള്ള GPS കണക്കുകൾ തെറ്റാവും. ഒരു കാലത്ത് വെറും സിദ്ധാന്തമായിരുന്ന ഈ ആശയം ഇന്ന് മൊബൈൽ ഫോണിലും യാത്രാ സംവിധാനങ്ങളിലും ഭാഗമാകുന്നുണ്ട്. ഇങ്ങനെ സയൻസ് രൂപപ്പെടുത്തിയ സാങ്കേതികവിദ്യ പിന്നീട് പുതിയ ശാസ്ത്രീയ അന്വേഷണങ്ങൾക്കും ശാസ്ത്രശാഖകൾ രൂപപ്പെടുത്താനും സഹായകമായിട്ടുണ്ട്.

ചാന്ദ്രദിനം