പൊങ്കാലനിഷ്ഠകൾ

പൊങ്കാലയിട്ട കലം വീട്ടിലെ ആവശ്യത്തിന് ഉപയോഗിക്കരുത്. ആ കലത്തിൽ ദേവപുഷ്പങ്ങൾ നട്ടുവളർത്താം.

- ജ്യോതിഷരത്നം ആറ്റുകാൽ ദേവീദാസൻ (9847575559)

പൊങ്കാലയ്ക്ക് ഒൻപതുദിവസം മുൻപ് വ്രതം തുടങ്ങണം. മത്സ്യമാംസാദികൾ ഉപേക്ഷിച്ച് ബ്രഹ്മചര്യവ്രതം എടുത്ത് രാവിലെ കുളിച്ച് ക്ഷേത്രദർശനം നടത്തി വേണം വ്രതമെടുക്കാൻ.

കഴിയുമെങ്കിൽ 2 നേരം കുളിക്കണം. പൊങ്കാലയുടെ തലേദിവസം ഒരിക്കലെടുക്കണം. പച്ചരിച്ചോറോ, ക്ഷേത്രത്തിലെ നിവേദ്യമോ കഴിക്കാം.

സന്ധ്യ കഴിഞ്ഞാൽ ആഹാരം കഴിക്കരുത്. പിറ്റേ ദിവസം പൊങ്കാല തിളച്ച ശേഷമേ ഭക്ഷണം കഴിക്കാവൂ.

പുരുഷന്മാർക്കും പൊങ്കാലയിടുന്നതിൽ കുഴപ്പമില്ല. എന്നാൽ പന്ത്രണ്ട് വയസ്സിന് മുകളിൽ പ്രായമുള്ള പുരുഷന്മാർക്ക് പൊങ്കാല ഇടാറില്ല.

സുഖമില്ലാത്തവർക്കും മറ്റ് കാരണങ്ങളാൽ പൊങ്കാല ഇടാൻ കഴിയാത്തവർക്കും വേണ്ടി മറ്റുള്ളവർ പൊങ്കാലയിടുന്നത് കുഴപ്പമില്ല.

ഒരാളുടെ പൊങ്കാല കഴിവതും അവർ തന്നെ നേദിക്കണം. എന്തെങ്കിലും കാരണത്താൽ പൊങ്കാലയിട്ടയാൾക്ക് നേദിക്കാൻ പറ്റിയില്ലെങ്കിൽ ഏറ്റവും അടുത്ത ബന്ധുക്കൾക്ക് നേദിപ്പിക്കാം.

പൊങ്കാലയിടുമ്പോൾ കോടിവസ്ത്രം ധരിക്കുന്നതാണ് ഉത്തമം. കോടിയില്ലെങ്കിൽ അലക്കി തേച്ചത് ധരിച്ചാലും മതി.

ഉണക്കലരി, വാഴയില, നാളികേരം, ശർക്കര, ചെറുപഴം, നെയ്യ്, പഞ്ചസാര, തേൻ, കൽക്കണ്ടം, അണ്ടിപ്പരിപ്പ്, ഉണക്കമുന്തിരി എന്നിവയാണ് പൊങ്കാലയ്ക്ക് വേണ്ടത്.

മൂന്ന് ചുടുകട്ടകൊണ്ടാണ് അടുപ്പുകൂട്ടേണ്ടത്. പുതിയ മൺകലം അലങ്കരിച്ചുവേണം പൊങ്കാല ഇടാൻ. അടുപ്പ് തീർത്ഥം തളിച്ച് ശുദ്ധമാക്കണം.

അടുപ്പിന് മുന്നിൽ വിളക്കും നിറപറയും വയ്ക്കുന്നത് ഐശ്വര്യപ്രദമാണ്. നിറപറയിലും നിലവിളക്കിലും ദേവി സാന്നിദ്ധ്യം ഉണ്ടായിരിക്കും. ഇത് ഐശ്വര്യം പ്രദാനം ചെയ്യും.