வர்த்தக நடவடிக்கைகளை VAT வரியிலிருந்து விலக்குதல்: ஒரு நிர்வாகப் பிழைக்கான திருத்தம்

இக்கட்டுரை, "பெறுமதி சேர் வரி" (VAT) மற்றும் அதற்கு முன்னோடியான "பொருட்கள் மற்றும் சேவைகள் வரி" (GST) ஆகியவற்றின் வலையிலிருந்து வர்த்தக (Trading) நடவடிக்கைகளை விலக்கி இருந்ததற்கான ஆரம்ப சட்ட நோக்கத்தை (Intention of the law) ஆராய்ந்து, வர்த்தகத்தை VAT வலையில் கொண்டுவந்ததற்கான தூரநோக்கற்ற கொள்கை மாற்றத்தை விமர்சிக்கிறது.

- 

இத்தகைய நடவடிக்கை, சீரான வரிக் கொள்கைகளுக்கு முரணானதும், பொருளாதாரத்தின் மீது தேவையற்ற சுமையை ஏற்படுத்தியதும், நிர்வாக மற்றும் நிதி சார்ந்த பிழை என நிறுவி, அதனை எவ்வாறு வரி வருமானத்திற்கு பாதிப்பின்றி சீர்செய்யலாம் என விபரிக்கின்றது.

பெறுமதி சேர் வரி (VAT) தற்போது இறக்குமதிகளுக்கும், சில நிபந்தனைகளுடன் வர்த்தகமாக மேற்கொள்ளப்படும் பின்வரும் வியாபார நடவடிக்கைகளுக்கும் விதிக்கப்படுகிறது:

உற்பத்தி மற்றும் தயாரிப்பு (Manufacturing and production), சேவை வழங்கல் (Provision of service)

வர்த்தகம் (Trading). (உள்ளூர் மொத்த அல்லது சில்லறைச் சந்தையில் பொருட்களை வாங்கி, விற்பனை செய்தல் என வர்த்தகம் பொருள்கோடப்படுகிறது).

VAT பெயரளவில் 2002 ஆகஸ்ட் 01 முதல் அமுல்படுத்தப்பட்டாலும், அது 1998 முதல், அப்போது மக்கள் கூட்டணி (PA) அரசு விற்பனை புரள்வு வரியை (Turnover Tax) நீக்கி, GST என்ற பெயரில் அறிமுகப்படுத்தியதன் மூலம் நடைமுறைக்கு வந்தது. 2001இல் ஆட்சிக்கு வந்த ஐ.தே.க. (UNP) அரசின் தேர்தல் வாக்குறுதியைத் தொடர்ந்து GSTஐ 2002ல் VAT ஆக மாற்றியது. இம்மாற்றம் வழமை போன்று மக்களை அரசியல் ரீதியாக ஏமாற்றுவதற்காக மேற்கொள்ளப்பட்ட ஒன்று. GST, VAT ஆகிய இரண்டு சட்டங்களையும் ஒப்பிட்டுப் பார்க்கும்போது, அவற்றின் அமைப்பும், செயற்பாட்டு முறைகளும் சுமாராக ஒரே மாதிரியானவை என்பதும், எனவே இது அடிப்படை நிதி சீர்திருத்தம் அல்ல, ஒரு பெயர் மாற்றம் மட்டுமே என்பதும் தெளிவாகிறது.

GST மற்றும் VAT இரண்டிலும் வர்த்தக நடவடிக்கைகளை விலக்கு அளித்தலானது நிதிக் கொள்கையின் விவேகமான முடிவு.

அரசியல் கட்சி முரண்பாடுகள், நிதிக் கொள்கை வகுப்பாளர்களின் வேறுபட்ட கருத்துக்களுக்கு மத்தியிலும், GST மற்றும் VAT சட்டங்களிலிருந்து வர்த்தக நடவடிக்கைகளை திட்டமிட்டு விலக்கியது இந்த வரி விலக்களித்தலின் முக்கியத்துவம், அவசியத்தை எடுத்துக்காட்டுகிறது. வர்த்தக நடவடிக்கைகளுக்கு இத்தகைய வரி விதிக்கப்படுமானால், கடுமையான நடைமுறை சிக்கல்கள் மற்றும் பொருளாதாரச் சிதைவுகள் ஏற்படும் என்ற நியாயத்தின் அடிப்படையில் எடுக்கப்பட்ட ஆழ்ந்த சிந்தனையுடன் கூடிய முடிவுதான் இது.

GST மற்றும் VAT சட்டங்களில் வர்த்தக நடவடிக்கைகளை விலக்கிய விதிகள், குறிப்பாக பிரிவு 3, சொல்லுக்குச் சொல் ஒரே மாதிரியாகவே இருந்தன.