யார் இந்த துனித் வெல்லாலகே?

இலங்கை கிரிக்கெட்டுக்கு கிடைத்த ஒரு தனித்துவம் மிக்க பரிசு துனித் வெல்லாலகே. 22 வயடைய துடுப்புமிக்க இளம் வீரராக துனித் வெல்லாலகே விளங்குகிறார்.

- எம்.எம்.சில்வெஸ்டர்

அவர் தனது கிரிக்கெட் பயணத்தின் ஆரம்பத்திலிருந்தே அசாத்தியமான திறமைகளை வெளிப்படுத்தியுள்ளார்.

அவரின் தனிச்சிறப்பு மிக்க திறமை, அசைக்க முடியாத அர்ப்பணிப்பு மற்றும் தலைமைத்துவப் பண்புகள் அவரை இலங்கை தேசிய கிரிக்கெட் அணிக்கு கொண்டு வரச் செய்தது.

2003 ஆம் ஆண்டு ஜனவரி 9 ஆம் திகதியன்று பிறந்த துனித் நெத்மிக்க வெல்லாலகே மொரட்டுவை சென். செபஸ்டியன் கல்லூரியின் 13 வயதுக்குட்பட்டோருக்கான சீ பிரிவு அணியில், தனது 10 ஆவது வயதில் முதல் அடியை எடுத்து வைத்தார். இதையடுத்து, ஒரு வருடம் கழித்து, கல்லூரியின் 13 வயதுக்குட்பட்டோருக்கான ஏ பிரிவு அணிக்குள் உள்வாங்கப்பட்டார். இக்காலப்பகுதியில், 57 விக்கெட்டுகளை வீழ்த்தி தனது திறமையை வெளிப்படுத்தியிருந்தார்.

பருவ கால கிரிக்கெட்டில் சிறந்த பந்து வீச்சாளர், சிறந்த சகலதுறை வீரர் மற்றும் போட்டியின் நாயகன் என பல விருதுகளையும் துனித் வெல்லாலகே அள்ளிக்கொண்டார். மேலும், 2014 ஆம் ஆண்டு 13 வயதுக்குட்பட்டோருக்கான போட்டியில் சென்.செபஸ்டியன் கல்லூரி அணி சம்பியன் பட்டத்தையும் வென்றிருந்தமை விசேட அம்சமாகும்.

இது வெறும் ஆரம்பம் தான். அடுத்த கட்டமாக, துனித் வெல்லாலகே, தனது 12 ஆவது வயதில் 15 வயதுக்குட்பட்டோருக்கான அணியில் சேர்ந்து 53 விக்கெட்டுகளை வீழ்த்தினார். மேலும், மாவட்டங்களுக்கு இடையிலான மற்றும் மாகாணங்களுக்கு இடையிலான போட்டிகளில் கொழும்பு மற்றும் மேல் மாகாண கிரிக்கெட் அணிகளை பிரதிநிதித்துவப்படுத்தும் வாய்ப்பையும் அவர் பெற்றுக் கொண்டதுடன், இலங்கை 14 வயதுக்குட்பட்ட அணிக்கு தேர்வாகியிருந்தார்.

பின்னர், 2017 ஆம் ஆண்டில், கொழும்பு 10 மருதானை சென். ஜோசப் கல்லூரியில் இணைந்து கொண்டார். இங்குதான் அவரின் கிரிக்கெட் வாழ்க்கையின் வெற்றிப் பயணம் ஆரம்பமாகியது.

சென். ஜோசப் கல்லூரியில் விளையாடிய காலத்தில், துனித் வெல்லாலகே தனது பந்துவீச்சு, துடுப்பாட்டம் போன்ற திறமைகளை வளர்த்திருந்தது போலவே, தலைமைத்துவப் பண்புகளை மேம்படுத்திக் கொண்டார். மிக இளம் வயதிலேயே அவர் தலைமைத்துவப் பண்புகளுக்குரிய விடயங்களை வெளிப்படுத்தியிருந்தமை குறித்தும் கட்டாயம் பேசியாக வேண்டும்.