யூனியன் அஷ்யூரன்ஸ் IDF உலக நீரிழிவு காங்கிரஸ் 2025 இல் சுவமக திட்டத்தை வெளிப்படுத்தியது

தேசத்தின் நீண்ட காலமாக இயங்கும் முன்னணி தனியார் ஆயுள் காப்புறுதி சேவை வழங்குனரான யூனியன் அஷ்யூரன்ஸ், தாய்லாந்தின், பாங்கொக் நகரில் நடைபெற்ற IDF உலக நீரிழிவு காங்கிரஸ் 2025 நிகழ்வில், இலங்கையை பிரதிநிதித்துவப்படுத்தி பங்கேற்றிருந்தது. சர்வதேச நீரிழிவு சம்மேளனத்தினால் (IDF) ஏற்பாடு செய்யப்பட்டிருந்த இந்த மாநாட்டில் 165க்கும் அதிகமான நாடுகளின் சுமார் 6800க்கும் அதிகமானவர்கள் பங்கேற்றிருந்தனர்.

- 

“நீரிழிவின் எதிர்காலத்தை வடிவமைப்போம்” ("Shape the Future of Diabetes") எனும் தொனிப்பொருளில் ஏற்பாடு செய்யப்பட்டிருந்த இந்த சர்வதேச மாநாடு, நீரிழிவு தவிர்ப்பு மற்றும் நிர்வகிப்பு தொடர்பில் காணப்படும் பிந்திய விஞ்ஞான ரீதியான கண்டுபிடிப்புகள், புத்தாக்கமான பராமரிப்பு முறைகள் மற்றும் தாக்கத்தை ஏற்படுத்தக்கூடிய தீர்மானமெடுத்தல் மூலோபாயங்கள் போன்றன தொடர்பில் கலந்துரையாடுவதற்கான சர்வதேச களமாக அமைந்திருந்தது.

இந்த மாநாட்டில், யூனியன் அஷ்யூரன்ஸ், இலங்கையில் நீரிழிவு தாக்கத்தை கட்டுப்படுத்துவதற்காக முன்னெடுக்கும் தனது பிரதான சமூகப் பொறுப்புணர்வு நடவடிக்கையான சுவமக திட்டத்தை வெளிப்படுத்தியிருந்தது. பரிபூரண, சமூகத்தை மையப்படுத்திய வழிமுறையாக அமைந்துள்ள சுவமக, விழிப்புணர்வை ஏற்படுத்தல், செயற்திடமான வாழ்க்கை முறையை ஊக்குவித்தல், ஆரம்பத்தில் இனங்காண உதவுதல் மற்றும் தனிநபர்களுக்கு தமது ஆரோக்கியத்தை நிர்வகிப்பதற்கு அவசியமான அறிவூட்டல் செயற்பாடுகளை இந்தத் திட்டத்தினூடாக மேற்கொள்கிறது.