செம்மணியில் கண்டறியப்படும் சிறுவர்களின் எச்சங்களைப் புறக்கணிக்கப் போகிறீர்களா?

சட்டத்தரணிகள், சிவில் செயற்பாட்டாளர்கள் கேள்வி

- நா.தனுஜா

ஒருகாலத்தில் நீங்கள் யுத்த வீரர்கள் எனப் புகழாராம் சூட்டினீர்கள். ஆனால் அவர்கள் உண்மையில் என்ன செய்தார்கள் என்பது இப்போது வெளிப்படுகையில், நீங்கள் என்ன கூறப்போகிறீர்கள்?

செம்மணியில் சிறுவர்களின் எலும்புக்கூடுகள் கண்டறியப்படும்போதும் நீங்கள் அதனைப் புறக்கணிக்கத்தான் போகிறீர்களா? அது உங்களின் பிள்ளையாக இருந்திருந்தால், நீங்கள் இதனைத்தான் செய்வீர்களா? என சட்டத்தரணிகள், சிவில் சமூக செயற்பாட்டாளர்கள் கேள்வி எழுப்பியுள்ளனர்.

அத்தோடு 'இது வெறுமனே வரலாற்றுடன் தொடர்புடைய கேள்வி மாத்திரமன்று. மாறாக இது மனிதாபிமானத்துடன் தொடர்புடைய கேள்வியாகும். இவ்வேளையில் அமைதியாக இருப்பது என்பது நடுநிலைமை அல்ல. மாறாக அது குற்றத்துக்கு உடந்தையாக இருத்தலாகும்' எனவும் அவர்கள் சுட்டிக் காட்டியுள்ளனர்.

செம்மணி சித்துபாத்தியில் அடையாளம் காணப்பட்ட மனிதப்புதை குழியின் இரண்டாம் கட்ட அகழ்வுப்பணிகள் நான்காவது நாளாக ஞாயிற்றுக்கிழமை (29) முன்னெடுக்கப்பட்டன.

அதன்படி செம்மணி மனிதப்புதைகுழியில் நேற்று முன்தினம் மதியம் வரையான காலப்பகுதியில் 33 மனித எலும்புக்கூட்டொகுதிகள் கண்டறியப்பட்டுள்ளன.

அத்தோடு இதுவரை காலமும் புதைகுழியில் இருந்து வேறு பொருட்கள் எவையும் மீட்கப்படாத நிலையில், நேற்று முன்தினம் நீலநிறப்பை ஒன்றும், துணித்துண்டு ஒன்றும் அடையாளம் காணப்பட்டுள்ளன.

அதனையடுத்து செம்மணி நிலம் பேச ஆரம்பித்திருக்கும் மனிதப்பேரவலம் தொடர்பில் சட்டத்தரணிகள், சிவில் சமூக செயற்பாட்டாளர்கள், மனித உரிமை ஆர்வலர்கள் எனப் பலரும் தமது சமூகவலைத்தளப்பக்கங்களில் கருத்து வெளியிட்டுள்ளனர்.

சட்டத்தரணி ஐங்கரன் குகதாசன்

அதன்படி இதுபற்றி தனது பேஸ்புக் பக்கத்தில் பதிவொன்றைச் செய்திருக்கும் சட்டத்தரணி ஐங்கரன் குகதாசன், 'தமிழர்கள் ஒடுக்குமுறை பற்றிப் பேசிய போதெல்லாம் அவர்கள் அமைதிப்படுத்தப்பட்டிருக்கிறார்கள். இதுபற்றிப் பேசுவது என்பது கடந்தகால மீறல்களை ஆதரிப்பதாகப் பொருள்கொள்ளப்படுகிறது. ஆனால் உண்மையில் அதன் அர்த்தம் அதுவல்ல. மாறாக இதுகுறித்துப் பேசுவது என்பது நாம் கூறுவதைச் செவிமடுங்கள் என்ற கோரிக்கையையும், நீதிக்கான தேடலையும் உள்ளடக்கியதாகும்.