தேசிய மக்கள் சக்திக்கு கிடைத்த வெற்றியே தமிழ்த்தேசிய கட்சிகளின் இணைவு முயற்சிக்கு காரணம்

உள்ளூராட்சிசபைத் தேர்தல் முடிவுகளின் அடிப்படையில் யாழ்ப்பாண மாவட்டத்தில் தேசிய மக்கள் சக்திக்கு கிடைத்த மிகப்பெரிய வெற்றியே தமிழ்த்தேசியக் கட்சிகள் தனித்து ஆட்சியமைக்க முடியாமல் போக பிரதான காரணம்.

- (தவராசா சுபேசன்)

அதேநேரம் கடந்த காலங்களில் தனித்து ஆட்சியமைத்த தமிழ்த் தேசியக் கட்சிகள் இன்று ஆளுக்கொரு பக்கம் பிரிந்து தொங்கு சபை அமைவதற்கு ஏதுநிலையை அமைத்துக் கொடுத்துள்ளனர்.

கடந்த ஆறு மாத காலத்திற்கு முன்னராக இடம்பெற்ற பாராளுமன்றத் தேர்தலில் யாழ்ப்பாண தேர்தல் மாவட்டத்தில் அநுர அலை பலமாக அடித்த அதேவேளையில் தமிழ்க்கட்சிகள் தமக்குள் பிளவுபட்டு தமது தோல்விக்கு தாமே காரணமாகினர்.

அதன் விளைவாக தேசிய மக்கள் சக்தி யாழ்ப்பாண தேர்தல் மாவட்டத்தில் என்றுமில்லாத ஒரு வரலாற்று வெற்றியைப் பதிவு செய்திருந்தது. அதன் பின்னரான உள்ளூராட்சி சபைத் தேர்தலில் அநுர அலை அடங்கி விட்டதாக பலரும் தெரிவித்துவரும் நிலையில் கடந்த கால உள்ளூராட்சிசபைத் தேர்தல் முடிவுகளோடு ஒப்பிட்டுப் பார்க்கையில் தேசிய மக்கள் சக்தி உள்ளூராட்சிசபைத் தேர்தலிலும் யாழ் மாவட்டத்தில் மிகப்பெரிய வரலாற்று வெற்றியை பதிவு செய்துள்ளது என்பதே உண்மை.

அதனை ஏற்றுக்கொள்ள முடியாதவர்கள் பாராளுமன்ற தேர்தலோடு உள்ளூராட்சிசபைத் தேர்தல் முடிவுகளை ஒப்பிட்டு மனதை தேற்றிக்கொள்கின்றனரே தவிர தமிழர் தாயகத்தில் ஒரு தேசியக் கட்சி அதிகப்படியான ஆசனங்களைப் பெறுவதும் தமிழ்த் தேசியக் கட்சிகள் தனித்து ஆட்சியமைக்க முடியாத ஒரு சூழலை ஏற்படுத்தியிருப்பதும் இதுவே முதற்தடவை.

கடந்த 2018ஆம் ஆண்டு இடம்பெற்ற உள்ளூராட்சிசபைத் தேர்தலில் யாழ்ப்பாண மாவட்டத்தில் இலங்கைத் தமிழரசுக் கட்சி மற்றும் தமிழ்த்தேசிய மக்கள் முன்னணி ஆகியன அதிக ஆசனங்களைக் கைப்பற்றியிருந்தன. பெரும்பாலான சபைகளில் இலங்கை தமிழரசுக் கட்சி ஆட்சியமைத்திருந்தது.

அதேநேரம் எதிரணியிலும் தமிழ்த்தேசிய கட்சியான தமிழ்த் தேசிய மக்கள் முன்னணி பலமான நிலையில் இருந்து சிறப்பாக சபைகளை கொண்டு சென்றிருந்தன. ஆனால் இன்று பல சபைகளில் பிரதான தமிழ்த்தேசிய கட்சிகள் இரண்டும் இணையாமல் ஆட்சியமைப்பது சாத்தியமற்றுக் காணப்படுகின்றது.