Ongelukkigheid oor die verwydering van sport en kultuur

Ons, as die ouergemeenskap van Panorama Primêr in Riversdal, Wes-Kaap, spreek hiermee ons ongelukkigheid uit oor die eensydige besluit wat geneem is om ons kinders - die kliënte van die skool - te ontneem van geleenthede om sport en kultuur buite die skool te beoefen.

- Bekommerde Panorama-ouer skryf:

Die besluit is geneem sonder om ons as ouers te raadpleeg of ons mening en gevoel oor dié besluit te vra.

Ons neem kennis dat die kurrikulum belangrik is by enige akademiese instansie, maar ons staan steeds vas dat holistiese ontwikkeling van 'n kind (akademies, sport, kultuur en geestelik) noodsaaklik is. Sport en kultuur is nie net deel van Panorama se tradisie nie, maar dra op 'n betekenisvolle wyse by tot die vorming van vaardighede wat ons kinders as volwassenes in die samelewing kan gebruik.