Alan Winde is vol planne

STILBAAI - Die premier van die Wes-Kaap, Alan Winde, het tydens 'n besoek aan Riversdal se nuwe sonkragaanleg tyd ingeruim om met die Stilbaai-gemeenskap te gesels.

- Johan Victor

Alan Winde (Premier van die Wes-Kaap) staan diep in gedagte by die sonkragaanleg in Riversdal. Foto: Roland Daames

(Roland Daames)

Hy het Maandag 27 Oktober by Privelistia in Jongensfontein 'n groot groep belangstellendes toegespreek. Alhoewel sy doel was om oor werkverskaffing te gesels het die gesprek baie vinnig probleme in Stilbaai, Jongensfontein en Melkhoutfontein ingesluit.

In sy verwelkoming het Hessequa-burgemeester, Grant Riddles, weereens beklemtoon dat die Wes-Kaap graag belê in 'n munisipaliteit wat werk en waar die belegging nie in 'n bodemlose put verdwyn nie.

'n Goeie voorbeeld is die R173 miljoen wat die provinsie bygedra het tot die sonkragaanleg in Riversdal. Die burgemeester het ook genoem dat hulle 'n watersuiweringsaanleg in Heidelberg gaan oprig om onafhanklik te raak van die peperduur water wat Overberg Water tans verskaf. Die provinsie dra die helfte van die onkoste, wat in totaal R34 miljoen beloop.