‘Daar is geld”, maar nie pale om elektrisiteit te koppel

LEDE van 'n gemeenskap naby Philippi-Oos sê hulle is al moeg gewag vir die installering van elektrisiteit in hulle area.

- ANELE MFAZWE

Inwoners by die Klipfontein Sendingstasie is so gefrustreerd dat hulle weer begin het om krag onwettig te koppel.

Gemeenskapsleiers in die area meen dis moeilik vir hulle om die mense te keer, want Eskom, die kragverskaffer, vat te lank om sy beloftes aan hulle na te kom.

Son het berig dat vier kinders, Storm Scholtz (12), Awam Simanga (9) en die boeties Lihle (11) en Lusando Dyadmeki (7), in September 2023 in die area doodgeskok is.

Die kinders is dood nadat hulle aan 'n lewende, onwettige elektriese draad geraak het by 'n dam waar hulle gespeel het.

Eskom het kort daarna die area ingegaan om alle onwettige elektriese drade te verwyder.

'n Gemeenskapsleier, Collette van Rensburg, het gesê die mense in die community het in dié verband hulle samewerking gegee, met die verstandhouding dat Eskom sal terugkom en krag vir álmal insit.

Van Rensburg het verduidelik dat die woonbuurt op private grond is wat aan die Metodistekerk behoort.

Gevolglik was dit in die verlede moeilik om enige ontwikkeling na die area te bring en dit sluit kragtoevoer na die gemeenskap in.