DOOD NÁ HY OMGERY IS

'N FAMILIE van Rosemoor in George is gebroke ná die dood van hulle geliefde seun.

- CARRINGTON SWARTS

L-Junior Jones (21) se lewe het skielik tot 'n einde gekom nadat hy op 9 Augustus omgery is, amper twee weke in die hospitaal was en toe op 22 Augustus in die Groote Schuur-hospitaal in Kaapstad aan sy beserings beswyk het.

L-Junior is die betrokke dag in die teenwoordigheid van familie, vriende en omstanders omgery.

Chad Oosthuizen, een van sy vriende, sê die dood van sy vriend voel steeds onwerklik.

"Ons het die Vrydagaand nog lekker gedrink en toe loop ons huis toe. Daar was 'n stryery tussen van ons vriende," vertel Oosthuizen hartseer.

Volgens Oosthuizen het L-Junior die stryery probeer keer en na een van sy vriende begin slaan.

"Ek het hom gekeer en gesê: 'My bra, wat maak jy dan nou? Dis dan jou vriend, dié!"

Oosthuizen het toe vir L-Junior op die sypaadjie, net sowat twee huise van sy huis af, probeer paai en afkoel. Die volgende oomblik hoor hulle net mense skree: "Woah! Woah!"

Toe Oosthuizen weer sien, kom daar 'n BMW en stamp hulle van die sypaadjie af.

Gesleep