பீடி புகையில் கருகும் கைதிகளின் வாழ்க்கை!

தமிழகச் சிறைகளில் ரூ.500 கோடி ஊழல்!

- -ராம்கி

'நானும் ஜெயில்ல இருந்திருக்கேன்..' என்று பெயர் குறிப்பிட விரும்பாத அந்த முன்னாள் சிறைவாசி நமக்கு அனுப்பிய கடிதத்தில் 'நக்கீரன்ல வர்ற ஜெயில் கட்டுரைகளைத் தொடர்ந்து படிச்சிட்டு வர்றேன். டிபார்ட்மெண்ட் ஆபீசர்ஸ் பண்ணிட்டு வர்ற மோசடிகளப் பத்தி நெறய வந்துட்டே இருக்கு. ஊழலை உரிஉரின்னு உரிக்கிறீங்க. அப்படியே கைதிகள் படற அவஸ்தைய கொஞ்சம் எழுதலாம்ல.

ஜெயில்ல இருந்து ரிலீஸாகி மூணு வருஷமாச்சு. இப்ப எனக்கு 57 வயசு. ஆனா... ஜெயில்ல உண்டான பாதிப்புல இருந்து என்னால மீள முடியல. இப்ப ஆஸ்துமா பிரச்சனை கொலையா கொல்லுது. எப்பவுமே எனக்கு பீடி, சிகரெட் பிடிக்கிற பழக்கம் கிடையாது. ஜெயில்லயும் வைராக்கியமா அப்படியே இருந்துட்டேன். ஜெயில்ல 100-க்கு 90 பேர் பீடி குடிக்கிறாங்க. அந்த 90 பேரும் பீடி குடிச்சாத்தான் ஜெயில் டென்ஷன்ல இருந்து கொஞ்சம் ரிலாக்ஸ் பண்ணிக்கலாம்னு நம்புறவங்க. எந்த நேரமும் ஊதித்தள்ளிட்டே இருப்பாங்க. இதுல கொடுமை என்னன்னா.. என்னை மாதிரி பீடி குடிக்காதவங்க.. பீடி குடிக்கிறவங்க விடற புகைய சுவாசிச்சிட்டே ஜெயில்ல நொந்துபோய் வாழறதுதான். அதான்.. லங்ஸ் கேன்சர்.. ஆஸ்துமால கொண்டுபோய் விட்டது. அதுவும் ஜெயில்ல இந்த பீடில அடிக்கிற கொள்ளை இருக்கே.. நல்லா விசாரிச்சு எழுதுங்க.. தலைசுத்திப் போயிரும்' என்று தனது கவலையை வெளிப்படுத்தியிருந்தார்.

சிறைகளுக்குள் பீடி: புகையிலை முதன்முதலில் அமெரிக்காவில் கண்டறியப்பட்டு, பிறகு ஐரோப்பாவில் அறிமுகம் செய்யப்பட்டது. ஐரோப்பா காலனித்துவத்தால் அடிமைகளாக நடத்தப்பட்ட மக்களிடம் கடுமையாக வேலை வாங்குவதற்கு புகையிலை முக்கியப் பொருளாக பயன்படுத்தப்பட்டது. ஆங்கிலேயரின் காலனி ஆதிக்கத்திலிருந்த இந்தியாவிலும் புகையிலை அறிமுகப்படுத்தப்பட்டு, தமிழகச் சிறைகளிலும் கைதிகளை அடிமையாக நடத்துவதற்காக சிறைக்குள் நுழைந்தது.