மதவாதப் பேச்சு! நீதிபதிக்கு கடும் எதிர்ப்பு!

நீதித்துறையை காவிமயமாக்கும் வேலையை ஆர்.எஸ்.எஸ்., விஸ்வ ஹிந்து பரிசத் அமைப்புகள் பல காலமாகத் தீவிரமாக முன்னெடுத்துவருகின்றன.

- தெ.சு.கவுதமன்

அதிலும், மோடி ஆட்சிப் பொறுப்புக்கு வந்தபின்னர் அதற்கான செயல்பாடுகள் தீவிரமாகியுள்ளன. ஆர்.எஸ்.எஸ். அமைப்பில் இயங்கி வந்த பலரும் தற்போது நீதிபதிகளாக பொறுப்புக்கு வந்துள்ளனர். அதன் வெளிப்பாடாக, நீதிபதிகளின் பல்வேறு தீர்ப்புகள் சர்ச்சைக்குரியதாக விவாதிக்கப்படுகின்றன.

இப்படியான சூழலில், அலகாபாத் உயர்நீதிமன்றத்தின் நீதிபதி ஒருவர், இந்துத்வா அமைப்பான வி.ஹெச்.பி. அமைப்பின் நிகழ்ச்சி ஒன்றில் கலந்துகொண்டதோடு மட்டுமல்லாமல், மத நல்லிணக்கத்துக்கு எதிராக சர்ச்சைக்குரிய வகையில் பேசியது நாடு முழுக்க அதிர்வலைகளை ஏற்படுத்தியுள்ளது.