விவசாயிகளுக்கு வஞ்சனை!

விவசாயிகள் நெல் உற்பத்தி செய்வதைவிட விளைந்த நெல்லை விற்பனை செய்வதற்கு படும் பாடு கொஞ்சநஞ்சமல்ல.

- -எஸ்.பி.எஸ்.

முன்பெல்லாம் விளைந்த நெல்லை அறுவடை செய்து களத்து மேட்டுக்கு கொண்டுவந்து அடித்து பதர் நீக்கி நெல்லை சேமிப்பதற்கு ஒரு வாரம்கூட ஆகும். நெல் அறுவடை இயந்திரங்கள் பெருமளவு வந்துவிட்ட பிறகு ஒரு மணி நேரத்திற்கு இரண்டு ஏக்கர் நெல்லை அறுவடை செய்து விடுகிறார்கள். இப்படி அறுவடை செய்ததை அரசு நேரடி நெல் கொள்முதல் நிலையங்களுக்கு கொண்டுவந்து, காத்திருந்து எடை போட்டு எடுக்கும் வரை விவசாயிகள் படும் வேதனை சொல்லி மாளாது. காரணம், ஒவ்வொரு கொள்முதல் நிலையத்திலும் விவசாயிகள் கொண்டுவரும் நெல் 15 நாள், 20 நாள், 30 நாட்களென கொள்முதலுக்காக காத்திருக்கும் நிலை. மழை பெய்துவிட்டாலோ மழையில் நனைந்து நெல் முளைத்துவிடுகிறது!

இது மட்டுமல்ல, புதிய ஊர்களில் நெல் கொள்முதல் நிலையம் திறப்பதற்கு அதிகாரிகளிடம் பெரும் போராட்டம் நடத்த வேண்டியுள்ளது. கடலூர் மாவட்டம் திட்டக்குடி அருகேயுள்ள செங்கமேடு கிராமத்தில் ஏற்கனவே இயங்கிவந்த நெல் கொள்முதல் நிலையத்தை தொடர்ந்து இந்த ஆண்டும் செயல்படுத்தக்கோரி, ஊர் முக்கியஸ்தர் சிகாமணி என்பவர் மாவட்ட ஆட்சியர், நுகர்வோர் வாணிபக்கழக மண்டல மேலாளர், கோட்ட மேலாளர், இப்படி பலருக்கும் மனு கொடுத்தும் 20 நாட்களாக கொள்முதல் நிலையம் திறக்கவில்லை. சென்னையிலுள்ள நுகர்வோர் வாணிபக் கழக இயக்குனர் வரை புகார் கொண்டுபோன பிறகு கொள்முதல் நிலையத்தை திறந்தார்கள். விவசாயி விளைய வைத்த நெல்லை விலைக்குக் கொடுப்பதற்கு தினம் தினம் செத்து செத்துப் பிழைக்க வேண்டியுள்ளது” என்கிறார் வீராணம் ஏரி பாசன விவசாயிகள் சங்கத் தலைவர் விநாயகமூர்த்தி.