અપાર ધૈર્યથી નિરાશા ખંખેરી, બીજા માટે પ્રેરણાસ્રોત બની...

અડધું શરીર અને એકના એક દીકરાને ગુમાવવાની પીડા ભોગવનારી ગરવી ગુજરાતણ-મોટિવેશનલ યુટ્યુબર ધરા શાહની કહાણી સાંભળીને થાય કે ઈશ્વર આવી હિંમત, સકારાત્મકતા સૌને આપે.

- દેવેન્દ્ર જાની (રાજકોટ)

સૌરાષ્ટ્રની એક દીકરી લગ્ન કરી આંખોમાં સપનાં આંજીને વિદેશ જાય છે. ન્યુલી મૅરીડ કપલ સુખેથી દામ્પત્યજીવન વિતાવી રહ્યું છે. ત્યાર બાદ એમના જીવનમાં આવે છે એક વળાંક. યુવતીને સારા દિવસો જાય છે. થોડા સમય બાદ વિધાતા માતૃત્વ તો આપે છે, પણ...

મળો ધરા શાહને. થોડા જ સમય પહેલાં અમેરિકાના ટેક્સાસના ડેલમાં વસતી ધરાએ કૃત્રિમ પગ હોવા છતાં દોડમાં ભાગ લીધો. એક ડગલું પણ માંડવું અસંભવ હતું ત્યાં ધરાએ સમયમર્યાદા પહેલાં પાંચ કિલોમીટરનું અંતર પૂર્ણ કર્યું ત્યારે આ પળ એના માટે હિમાલય સર કરવા કરતાં પણ વધુ ખુશી આપનારી હતી.

સૌરાષ્ટ્રના સાવરકુંડલામાં માતા-પિતા-ત્રણ બહેન-એક ભાઈવાળા પરિવારમાં જન્મેલી ધરાનું બાળપણ સામાન્ય હતું. સ્કૂલ-કૉલેજનો અભ્યાસ સાવરકુંડલામાં જ. ત્યાર બાદ ધરાનું માગું વિદેશથી આવતાં માતા-પિતા દક્ષાબહેન-જિતેન્દ્રભાઈની ખુશીનો પાર ન રહ્યો. મૂળ ભાવનગરના અમેરિકામાં વસતા એન્જિનિયર સિદ્ધાર્થ શાહ સાથે ધામધૂમથી લગ્ન થયા બાદ અનેક અરમાન સાથે ધરા ૨૦૧૩માં અમેરિકા ગઈ. અમેરિકાની ધરતી પર દામ્પત્યજીવન ખુશીથી પસાર થઈ રહ્યું હતું. લગ્નને પાંચેક વર્ષ વીતી ગયા પછી સમય આવ્યો હતો એક નાના મહેમાનને સત્કારવાનો.

હમણાં ભારતપ્રવાસે આવેલી ધરા શાહ ચિત્રલેખાને કહે છેઃ ‘૨૦૧૮માં અમે બેબી પ્લાન કર્યું. બસ, હવે માતૃત્વનાં ઓવારણાં લેવાની ઘડીની પ્રતીક્ષા હતી. ૨૦૧૯ના ફેબ્રુઆરીમાં ડિલિવરી માટે હું હૉસ્પિટલમાં ઍડ્મિટ થઈ. જો કે આ નૉર્મલ ડિલિવરી નહીં હોય એવું મને ડૉક્ટરે કહ્યું. સિઝેરિયનથી પુત્રનો જન્મ થયો...’