એક પ્રોફેસરના શોખ અને ખોજથી ઊભું થયેલું સંગ્રહાલય

જગાની દૃષ્ટિએ જોશો તો એ નાનું દેખાશે, પણ એની પાછળનું વિઝન મોટું છે. વળી, આ મ્યુઝિયમ એક શૈક્ષણિક સંકુલમાં ઊભું કરાયું છે એ પણ એક વિશેષતા છે.

- અરવિંદ ગોંડલિયા (વઘઈ)

બોલો, કોઈ કહી શકે કે ગુજરાતના છેવાડાના ગામના નાનાસા મ્યુઝિયમ માટેની પ્રેરણા છેક દિલ્હીના કાર્યક્રમમાંથી મળે? અહીંથી વાત અટકતી નથી. જે પ્રોફેસરને આ પ્રેરણા મળી અને જેણે આ સંગ્રહાલય ઊભું કર્યું એને ગુજરાતની ઐતિહાસિક અને સાંસ્કૃતિક વિરાસતને વિવિધ માધ્યમથી ઉજાગર કરવા માટે આ વર્ષનો એવૉર્ડ મળી રહ્યો છે.

તો, વાત આમ છે... અને એ વાત જાણવા આપણે જઈએ છીએ ડાંગ જિલ્લાના વઘઈ ગામ, જ્યાં જિલ્લા શિક્ષણ અને તાલીમભવનના એક અલાયદા હૉલમાં RESOURCE CENTRE FOR ART AND CRAFT નામે સંગ્રહાલય ઊભું કરવામાં આવ્યું છે. હૉલમાં પ્રવેશ વાઘદેવતા દર્શન દેશે અને જેવો પ્રવેશ કરશો કે જાણે ડાંગી સંસ્કૃતિના ગર્ભમાં પ્રવેશ કર્યો હોય એવો માહોલ જોવા મળશે. ચારે બાજુ દીવાલ પર ડાંગના વીર શૂરવીરોની તસવીરી દાસ્તાન, ડાંગમાં ફરવા જેવાં સ્થળો, વારલી-પીઠોરા અને દર્શનીય કેટલીય હસ્તકળાના નમૂના સાથે ડાંગની ઐતિહાસિક ધરોહર જોવા મળે છે.