રેખાબા સરવૈયા-ડિમ્પલ દેસાઈ: એમણે ઊછળ્યો અપરિણીત માતૃત્વનો ઉત્સવ

મહિલા અને માતૃત્વ સિક્કાની બે બાજુ છે. આજે ડિજિટલ યુગમાં પણ લગ્ન નહીં કરીને માતૃત્વ ધારણ કરવાનો નિર્ણય કરવો કોઈ મહિલા માટે સહેલો નથી ત્યારે એક દસકા કરતાં વધુ સમય પહેલાં સૌરાષ્ટ્રમાં એક ઉચ્ચ સરકારી અધિકારીએ ‘સિંગલ મધર’નું સ્ટેટસ મેળવીને સૌકોઈને ચોંકાવી દીધા હતા. બીજી બાજુ, થોડા સમય અગાઉ સુરતના ખ્યાતનામ કુટુંબની કન્યાએ પણ સંજોગો પારખીને સિંગલ મધર બનવાનો હિંમતભર્યો નિર્ણય કર્યો. મહિલા દિને જાણીએ આ બહુમુખી પ્રતિભા ધરાવતી મહિલાના વિચારો અને અનુભવોને.

- દેવેન્દ્ર જાની - અરવિંદ ગોંડલિયા

રેખાબા સરવૈયા-અભિજ્ઞા.

મનમાં વિચારનો દોરો, હાથમાં છે કલમની સોય અને સામે છે ફરફરતું – સંજોગોનું સાવ પાતળું પોત! ને એના પર જીવતરનું રંગીન ભરતકામ કરવાની હિંમતનું નામ એટલે સ્ત્રી..

એક મહિલાની સંવેદનાને સમજવા લેખિકાએ શબ્દોના સાથિયા કંઈક આ રીતે સજાવ્યા છે. એવું કહેવાય છે કે સ્ત્રી માતૃત્વ ન પામે ત્યાં સુધી અધૂરી છે અને એના માટે એણે લગ્નસંસ્કારના સામાજિક રિવાજને સ્વીકારવો પડે છે. આજે જો કે ઘણી મહિલા ક્રાંતિકારી વિચારોથી માતૃત્વનું સુખ પામી રહી છે. મહિલા દિનના અવસરે એક એવી મહિલાની વાત કરવી છે, જે ગુજરાત સરકારના મહેસૂલ વિભાગમાં ઉચ્ચ હોદ્દા પર કાર્યરત છે, પરંતુ જે સમાજમાં આજે પણ ઓજલપ્રથા જોવા મળે છે એ ક્ષત્રિય સમાજમાંથી આ મહિલા આવે છે, છતાં ચોંકાવનારું પગલું ભરીને એમણે યુવા પેઢીમાં કુતૂહલ ઉત્પન્ન કર્યું છે.

ખોળાનો ખૂંદનાર દે જો રન્નાદે.. સંતાનસુખ માટે મહિલા પથ્થર એટલા દેવ પૂજે એ સમયનો પ્રવાહ હવે બદલાયો છે. ટેક્નોલૉજીના યુગમાં નિઃસંતાન દંપતી સ્ત્રીરોગ નિષ્ણાતો પાસે જઈને સંતાન મેળવવા અનેક વિકલ્પોનો સહારો લઈ શકે છે, પરંતુ અહીં જે મહિલાની વાત છે એમણે લગ્ન નહીં કરીને સ્વમાનભેર માતૃત્વ પ્રાપ્ત કર્યું છે અને જાહેર જીવનમાં સિંગલ મધરના સ્ટેટસ સાથે એક દસકાથી વધુ સમય ગૌરવ સાથે વિતાવ્યો છે.

આ મહિલાનું નામ છે રેખાબા સરવૈયા, જે અત્યારે પોરબંદરનાં એડિશનલ કલેક્ટર તરીકે કાર્યરત છે. GAS (ગુજરાત ઍડ્મિનિસ્ટ્રેટિવ સર્વિસ) કૅડરનાં ઉચ્ચ અધિકારી હોવા ઉપરાંત રેખાબા સારાં લેખિકા, કવયિત્રી, પ્રખર વક્તા, રેડિયો ઉદ્ઘોષક, અભ્યાસુ જ્યોતિષી અને પ્રકૃતિપ્રેમી પણ છે અર્થાત્ બહુમુખી પ્રતિભાનાં માલિક છે.

રાજકોટ જિલ્લાના ધોરાજી તાલુકામાં આવેલું છત્રાસા ગામ એમનું વતન. નાનાએવા ગામમાં ઉછેર છતાં અનેક સંઘર્ષો વચ્ચે એ વિજ્ઞાનમાં અનુસ્નાતક બન્યાં. યુનિવર્સિટીમાં પ્રથમ આવ્યા પછી જર્નાલિઝમની ડિગ્રી પણ પહેલા ક્રમ સાથે મેળવી. જો કે જીવનમાં એમણે ઊંડા આઘાત ખૂબ સહન કર્યા, પણ કપરા સંજોગોએ જ એમને મનથી મજબૂત બનાવ્યાં છે.