കമ്യൂണിക്കേഷനിലൂടെ ജനറേഷൻഗ്യാപ് മറികടക്കാം.കുടുംബബിസിനസ് വളർത്താം

കേരളത്തിന്റെ ചരിത്രത്തിലിടം നേടിയ നാലു പ്രമുഖ ബിസിനസ് ഗ്രൂപ്പുകളിലെ പുതുതലമുറ കുടുംബ ബിസിനസിലേക്കുള്ള അവരുടെ കടന്നുവരവ്, ജനറേഷൻ ഗ്യാപ്, ഭാവിപദ്ധതികൾ എന്നിവ പൈതൃക ബിസിനസിലെ പുതുമുഖങ്ങൾ' എന്ന പാനൽ ചർച്ചയിൽ വിശദീകരിക്കുന്നു.

- 

മാറ്റം അതിവേഗം, ഇപ്പോൾ എന്തു ചെയ്താൽ മുന്നേറാം എന്നതിലാണ് ശ്രദ്ധ

നസ്‌നിൻ ജഹാംഗീർ എക്സിക്യൂട്ടീവ് ഡയറക്ടർ & സിഇഒ, നെസ്റ്റ് സോഫ്റ്റ്വെയർ (നെസ്റ്റ് ഗ്രൂപ്പ്).

കുടുംബ ബിസിനസിലേക്കു പ്രവേശിക്കുമ്പോൾ, ആ പാരമ്പര്യം നമുക്കു തരുന്ന ഒരു ശക്തിയുണ്ട്. അതിനപ്പുറം കമ്പനിയെ പുതിയ തലത്തിലെത്തിക്കാനുള്ള നമ്മുടെ ശ്രമങ്ങളെക്കുറിച്ച് ഒരു ധാരണ/ബാലൻസിങ് വേണം. അതു നാം സ്വയം കണ്ടെത്തേണ്ടതാണ്.

രണ്ടാം തലമുറയായാണ് ഞാൻ ബിസിനസിലേക്കു വന്നത്. അതുകൊണ്ടുതന്നെ പ്രത്യേക ഒരു പോയിന്റ് ചൂണ്ടിക്കാട്ടി എവിടെ നിന്നാണു തുടങ്ങിയതെന്നു പറയാനാവില്ല. മറിച്ച് സ്ഥാപകരിൽ നിന്നു പഠിച്ചു മുന്നേറാനാണു ശ്രമിച്ചത്. ഡിജിറ്റൽ ട്രാൻസ്ഫർമേഷനിലൂടെ ബിസിനസ് മോഡലിൽ മാറ്റം കൊണ്ടുവന്നതും മേഖലയിലെ പ്രമുഖരെ സ്ഥാപനത്തിലേക്ക് എത്തിക്കാനായതും വളർച്ചയ്ക്കു സഹായിച്ചു.

മുൻതലമുറ തെറ്റാണെന്നു സ്ഥാപിക്കാനല്ല, മറിച്ച് ഞങ്ങളുടെ വശം അവരെ ബോധ്യപ്പെടുത്താനാണ് ഞാൻ ശ്രമിക്കുന്നത്. സ്വന്തം തെറ്റിൽ നിന്നു നാം പഠിക്കണമെന്ന് അവരും ആഗ്രഹിക്കുന്നു. അതുകൊണ്ടാകാം വലിയ എതിർപ്പുകൾ എനിക്കുണ്ടായിട്ടില്ല. മാത്രമല്ല, മുൻ തലമുറയെക്കാൾ ഞങ്ങളുടെ തലമുറ കമ്യൂണിക്കേഷനിൽ കുറെക്കൂടി ഓപ്പൺ ആണെന്നു തോന്നുന്നു.

18 വയസ്സ് വ്യത്യാസമുണ്ടായിരുന്നു പിതാവ് എൻ.ജഹാംഗീറും ജ്യേഷ്ഠൻ ജാവേദ് ഹസനും തമ്മിൽ. അവരുടെ അഭിപ്രായങ്ങളിൽ വലിയ അന്തരമുണ്ടായിരുന്നു. ഞാനും സഹോദരൻ അൽതാഫും തമ്മിൽ രണ്ടു വയസ്സിന്റെ വ്യത്യാസമേ ഉള്ളൂവെങ്കിലും അഭിപ്രായവ്യത്യാസങ്ങൾ വലുതാണ്.

ഞങ്ങളുടെ വിജയത്തിന്റെ അടിസ്ഥാനം മികച്ച ജീവനക്കാരാണ്. ഐടി ബിസിനസിൽ ഏറ്റവും വലിയ വെല്ലുവിളിയും അവസരവും ജീവനക്കാരിലാണ്. പഴയവരെയും യുവാക്കളെയും സഹകരിപ്പിച്ചു കൊണ്ടു പോകുക, അനുയോജ്യരായവരെ കണ്ടെത്തി ഉപയോഗിക്കുക എന്നതെല്ലാം നിർണായകമാണ്.

എല്ലാത്തിലും ഉപരി പൈതൃക ബിസിനസ് എന്ന നിലയിൽ സുസ്ഥിരമായ വളർച്ച ഉറപ്പാക്കൽ കടുത്ത വെല്ലുവിളിയാണ്. ബ്രാൻഡ് നെയിം, വിശ്വാസ്യത, ഉപയോക്താക്കളുമായുള്ള ബന്ധം എല്ലാം നിലനിർത്തണം. പാരമ്പര്യമായിക്കിട്ടിയ ഇവ ഒന്നേന്നു തുടങ്ങുക നിസാര കാര്യമല്ല.