കുട്ടിക്ക് വേണോ പാൻ

കുട്ടികളുടെ പേരിൽ ഡീമാറ്റ് അക്കൗണ്ട് തുടങ്ങാൻ പാൻ കാർഡ് നിർബന്ധമാണ്

- സുമ സണ്ണി

വിവിധ സാമ്പത്തിക ആവശ്യങ്ങൾക്കായി പാൻകാർഡ് കുട്ടികൾക്കും എടുക്കാം. ബാങ്ക് അക്കൗണ്ടു തുറക്കാനും വിവിധ നിക്ഷേപങ്ങൾ നടത്താനും അടക്കം പാൻ ഗുണകരമാണ്. ബാല്യത്തിലെ കുട്ടിയുടെ ഐഡന്റിറ്റി സ്ഥാപിക്കാനും ഭാവി ഇടപാടുകൾ ലളിതമാക്കാനും മൈനർ പാൻ കാർഡ് സഹായിക്കും.

കുട്ടിയെ സാമ്പത്തിക ഉൽപന്നങ്ങളിൽ നോമിനിയാക്കൽ, വസ്തു വകകൾ കുട്ടിയുടെ പേരിൽ റജിസ്റ്റർ ചെയ്യൽ എന്നിവയും പാൻ എളുപ്പമാക്കുന്നു. ഇതുവഴി ഇവയിലെല്ലാം കുട്ടിക്ക് നിയമപരമായ അവകാശവും ഉറപ്പാക്കാം. കുട്ടിയുടെ വരുമാനം മാതാപിതാക്കളുടെ വരുമാനവുമായി കൂട്ടിച്ചേർത്തു നികുതി നൽകേണ്ടിവരുമ്പോൾ മൈനർ പാൻകാർഡ് ആവശ്യമാണ്. മാത്രമല്ല, ആവശ്യമായ മാറ്റങ്ങൾ വരുത്തി ജീവിതകാലം മുഴുവൻ ഈ പാൻ ഉപയോഗിക്കുകയും ചെയ്യാം.