ഗോൾഡ് ഓവർ ഡ്രാഫ്റ്റാണ് താരം സ്വർണം സുരക്ഷിതം; ആവശ്യത്തിനു പണം കുറഞ്ഞ പലിശയിൽ

സ്വർണപ്പണയ വായ്പയെക്കാൾ മികച്ചതും ഉപകാരപ്രദവുമാണ് സ്വർണം ഈടായുള്ള ഓവർഡ്രാഫ്റ്റുകൾ

- 

കയ്യിലെ സ്വർണം ഏറ്റവും സുരക്ഷിതമായി രാത്രിയെന്നോ പകലെന്നോ ഇല്ലാതെ സൂക്ഷിക്കാം. പെട്ടെന്ന് അത്യാവശ്യം വന്നാൽ ഏതു സമയത്തും പണവും ലഭിക്കും. ഇപ്പോൾ ഏറെ ജനപ്രിയമായിരിക്കുന്ന ഗോൾഡ് ഓവർഡ്രാഫ്റ്റാണ് ഈ അവസരം നിങ്ങൾക്കു നൽകുന്നത്. സ്വർണവില നാൾക്കുനാൾ കൂടിവരുന്നതിനാൽ സ്വർണം ഈടു നൽകിയുള്ള വായ്പ പദ്ധതികളിലും മാറ്റങ്ങൾ വരുകയാണ്.

അതിന്റെ ഭാഗമായി പ്രധാന ബാങ്കുകളും എൻബി എഫ്സികളും ഗോൾഡ് ലോണിന്റെ പുതിയ പതിപ്പായ ഗോൾഡ് ഓവർഡ്രാഫ്റ്റ് സ്കീമുകൾ അവതരിപ്പിച്ചിട്ടുണ്ട്.

സവിശേഷതകൾ

സാധാരണ ഗോൾഡ് ലോണുകളെ അപേക്ഷിച്ചു പല സവിശേഷതകളും ഇവയ്ക്കുണ്ട്.

സ്വർണത്തിന്റെ മൂല്യം അനുസരിച്ചാണ് ഓവർഡ്രാഫ്റ്റിന്റെ പരിധി നിശ്ചയിക്കുന്നത്. ഈ പരിധി വരെ പണം പിൻവലിക്കാം.

പിൻവലിച്ച തുകയ്ക്കാണ് പലിശ എന്നതിനാൽ ശരിയായി ഉപയോഗിച്ചാൽ പലിശബാധ്യത കുറയും.

ഡെബിറ്റ് കാർഡ്, മൊബൈൽ ആപ്, ഇന്റർനെറ്റ്ബാ ങ്കിങ് എന്നിവവഴിയെല്ലാം ഏതു സമയത്തും (24x7) പണം പിൻവലിക്കാം, തിരിച്ചടയ്ക്കാം.

എടുത്തത് തിരികെയടച്ചാൽ ആ തുകയടക്കം കാലാവധിക്കുള്ളിൽ വീണ്ടും പിൻവലിക്കാം.