കേരളത്തിൽ നടപ്പാക്കുക മെഡിസെപ്പ് പോലൊരു ദുരന്ത പദ്ധതിയാകുമോ?

എൻപിഎസ് നടപ്പാക്കിയ 2004 മുതൽ ഇതുവരെ ലക്ഷക്കണക്കിനു ജീവനക്കാർ കോടിക്കണക്കിനു തുകയതിൽ നിക്ഷേപിച്ചിട്ടുണ്ട്. സർക്കാർ വിഹിതമടക്കം നിക്ഷേപിച്ചു വളർത്തിയെടുത്ത ആ സമ്പത്ത് വളരെ വലുതാണ്

- 

"കേന്ദ്രസർക്കാർ ഇപ്പോൾ അവതരിപ്പിച്ചിരിക്കുന്ന ഏകീകൃത പെൻഷൻ പദ്ധതി കേരള സർക്കാർ നടപ്പാക്കാൻ സാധ്യതയില്ല. നിലവിലെ സാമ്പത്തിക പ്രതിസന്ധിയുടെ സാഹചര്യത്തിൽ നയാ പൈസയുടെ വിഹിതം അധികം നൽകാൻ കേരള സർക്കാരിനു കഴിയില്ല. അതുകൊണ്ടുതന്നെ സർക്കാർ വിഹിതം കാര്യമായി ഉയർത്തുന്ന യുപിഎസിനെ അവഗണിക്കുകയേ നിവൃത്തിയുള്ളൂ. ' സംസ്ഥാന സർക്കാർ ജീവനക്കാരിൽ നല്ലൊരു ഭാഗവും വിശ്വസിക്കുന്നത് ഇങ്ങനെയാണ്. അപ്പോൾ പിന്നെ എൻപിഎസ് എന്ന നിലവിലെ പദ്ധതി തുടരുമോ ? അതിനു സാധ്യതയില്ലെന്നുതന്നെ വേണം കരുതാൻ. കാരണം എൻപിഎസ് പിൻവലിക്കുമെന്നത്ഇ ടതുപക്ഷ സർക്കാരിന്റെ വാഗ്ദാനമാണ്. എൻപിഎസിൽ വലിയൊരു വിഭാഗം ജീവനക്കാരും അസംതൃപ്തരാണ്. ജീവനക്കാരൻ വിഹിതം നൽകിയിട്ടും കിട്ടുന്ന പെൻഷൻ തുകയ്ക്ക് യാതൊരു ഗാരന്റിയുമില്ല എന്നതും ഇപ്പോൾ വിരമിച്ചവർക്കു തുച്ഛമായ പെൻഷനേ കിട്ടുന്നുള്ളൂ എന്നതും പങ്കാളിത്ത പെൻഷനെതിരെയുള്ള എതിർപ്പ് കൂടുതൽ ശക്തമാക്കിയിട്ടുണ്ട്. സർക്കാർ ജീവനക്കാരുടെ ഈ അതൃപ്തി എൽഡിഎഫ് സർക്കാരിനെതിരായ വികാരമായി വളരുന്നതിലെ അപകടം അധികൃതർ തിരിച്ചറിഞ്ഞതു കൊണ്ടാണ് എൻപിഎസിൽ നിന്നും കേരളം പിൻവാങ്ങും എന്ന് ആവർത്തിച്ചു പറയുന്നതും.

അതായത്, നിലവിലുള്ള എൻപിഎസിൽ നിന്നും പിൻവാങ്ങുകയും പുതുതായി അവതരിപ്പിച്ച പദ്ധതിയിൽ ചേരാതിരിക്കുകയും ചെയ്താൽ പിന്നെ എന്താണ് മുന്നിലുള്ള മാർഗം ?