പ്രീമിയം സോപ്പിൽനിന്ന് മാസം 1.5 ലക്ഷം ലാഭം കൊയ്യുന്ന യുവസംരംഭക

കാസ്റ്റിക് സോഡയില്ലാതെ, അലോവേരയടക്കം ചേർത്തു നിർമിക്കുന്ന സോഷ് ഉടനെ വിദേശവിപണികളിലേക്കും എത്തും.

- ടി.എസ്.ചന്ദ്രൻ മുൻ ഡെപ്യൂട്ടി ഡയറക്ടർ, സംസ്ഥാന വ്യവസായ വാണിജ്യവകുപ്പ്

വിപണിയിലുള്ള ഉൽപന്നമാണെങ്കിലും വ്യത്യസ്തതകളോടെ ലഭ്യമാക്കാൻ കഴിഞ്ഞാൽ വിജയിക്കാൻ എളുപ്പമാണെന്നു തെളിയിക്കുകയാണ് നെയ്യാറ്റിൻകരയിലെ മഞ്ജു എസ്. ആരോഗ്യം സംരക്ഷിക്കുന്ന ഉൽപന്നങ്ങളോട് ജനങ്ങൾക്ക് എന്നും വലിയ താല്പര്യമാണെന്ന യാഥാർഥ്യം ഫലപ്രദമായി ഉപയോഗപ്പെടുത്തിയതോടെ സോപ്പ് എന്ന സർവസാധാരണമായ ഉൽപന്നത്തിലും മിന്നുന്ന വിജയം കൊയ്യുകയാണ് ഈ യുവസംരംഭക നെയ്യാറ്റിൻകരയ്ക്കടുത്ത് ചെമ്പരത്തിവിള എന്ന സ്ഥലത്താണ് DOMZ Beauty Soaps പ്രവർത്തിക്കുന്നത്.

എന്താണ് പ്രത്യേകത?

ആരോഗ്യസോപ്പുകളുടെ നിർമാണവും വിൽപനയുമാണ് മഞ്ജുവിന്റെ ബിസിനസ്. സാധാരണ സോപ്പുകളെക്കാൾ അൽപം വില കൂടുമെങ്കിലും ആരോഗ്യത്തിനു ഗുണകരമാണ് എന്നതാണ് മേന്മ. ചാർക്കോൾ, അലോവേര, ലാവൻഡർ, റോസ്, ലെമൺ എന്നിങ്ങനെ 5 വെറൈറ്റി സോപ്പുകളാണ് ഉൽപാദിപ്പിക്കുന്നത്. ഒറിജിനൽ ഫ്ലേവറുകളിലാണ് ഈ സോപ്പുകൾ നിർമിക്കുന്നത്. മാത്രമല്ല, പ്രധാന ഘടകമായ അലോവേര സ്വന്തമായി കൃഷിചെയ്തെടുത്താണ് ഉപയോഗിക്കുന്നത്. മെഷിനറികൾ ഉപയോഗിക്കാതെ, കൈകൊണ്ടു സോപ്പുകൾ നിർമിക്കുന്നു എന്ന പ്രത്യേകതയുമുണ്ട്.

എന്തുകൊണ്ട് ഈ ബിസിനസ്?