പല പല ലക്ഷ്യങ്ങൾക്ക് പണം കണ്ടെത്താം

ഒരൊറ്റ വഴിയിലൂടെ ടോപ് അപ് എസ്ഐപി

- രാജ്യശ്രീ എസ്.

നിക്ഷേപ തുക ചെറുതാണെങ്കിലും കോമ്പൗണ്ടിങ്ങിന്റെ മാജിക്കുകൊണ്ട് ദീർഘകാലത്തിൽ വലിയ സമ്പത്തു വളർത്തിയെടുക്കാനുള്ള എസ്ഐപിയുടെ (സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ) മികവ് മ്യൂച്വൽഫണ്ട് നിക്ഷേപകരിൽ നല്ലൊരു ഭാഗവും അനുഭവിച്ചറിഞ്ഞു കൊണ്ടിരിക്കുന്നതാണ്. എന്നാൽ, എസ്ഐപിയിൽ ചെറിയ ഒരു വാല്യൂ അഡിഷൻ കൂടി നടത്തിയാൽ നിങ്ങളുടെ നിക്ഷേപ സമ്പത്തിന്റെ വളർച്ച അതിവേഗത്തിലാക്കാം.

അതാണ് സിപ് ടോപ് അപ്. എന്താണ് അതെന്നല്ലേ?

ആദ്യം നിങ്ങളുടെ പോക്കറ്റിലൊതുങ്ങുന്ന ചെറിയൊരു തുക കൊണ്ടു തിരഞ്ഞെടുത്ത നല്ലൊരു ഇക്വിറ്റിഫണ്ടിൽ എസ്ഐപി തുടങ്ങുക. അതിനു ശേഷം ഓരോ വർഷവും നിങ്ങളുടെ നിക്ഷേപ തുക ചെറിയതോതിൽ വർധിപ്പിച്ചു കൊണ്ടേയിരിക്കുക. അഥവാ ടോപ് അപ് ചെയ്യുക. അതുവഴി നിങ്ങളുടെ സമ്പത്ത് ഗണ്യമായി വർധിക്കും. വിവിധ ലക്ഷ്യങ്ങൾക്ക് അതാതു സമയത്ത് ആവശ്യമായ പണം ഉറപ്പാക്കാനും സാധിക്കും.

രാജ്കുമാർ എന്ന ഒരു സാധാരണക്കാരന്റെ ജീവിതലക്ഷ്യങ്ങളിലേക്കുള്ള ഒരു സാങ്കൽപിക യാത്രയിലൂടെയാണ് ഇവിടെ ടോപ് അപ്എ സ്ഐപിയുടെ മികവുകൾ വിവരിക്കുന്നത്.

എന്നാൽ നിങ്ങളെ സംബന്ധിച്ച് ഇതു സാമ്പത്തിക ലക്ഷ്യങ്ങളിലേക്കുള്ള യഥാർഥ യാത്രയാക്കാവുന്നതാണ്. അതിനായി നിങ്ങളുടെ പ്രായം, വരുമാനം, നിക്ഷേപത്തിനു നീക്കി വയ്ക്കാവുന്ന തുക, വിവിധ ലക്ഷ്യങ്ങൾക്കായി അതാതു സമയത്തു വേണ്ടിവരുന്ന തുക എന്നിവയെല്ലാം വിലയിരുത്തി എസ്ഐപിയിൽ നിക്ഷേപിക്കുക. ടോപ് അപ് ചെയ്യുക

എസ് ഐപിയുടെ ജനപ്രീതി കുതിക്കുന്നു

ഇക്കഴിഞ്ഞ ഏപ്രിൽ മാസത്തിൽ മാത്രം മ്യൂച്വൽ ഫണ്ട് എസ്ഐപി വഴി എത്തിയ നിക്ഷേപം 20,000 കോടി രൂപയാണ്. 63.6 ലക്ഷത്തോളം പുതിയ എസ്ഐപി അക്കൗണ്ടുകൾ ഒരു മാസത്തിൽ റജിസ്റ്റർ ചെയ്തു.

എസ്ഐപിയുടെ കുതിച്ചുയരുന്ന ജനപ്രീതിക്കു വേറേ എന്തു തെളിവാണു വേണ്ടത്.

എന്തുകൊണ്ടു സാധാരണക്കാർ ഈ നിക്ഷേപമാർഗത്തിലേക്ക് ആകർഷിക്കപ്പെടുന്നു എന്ന ചോദ്യം ഇവിടെ പ്രസക്തമാണ്. സ്ഥിരനിക്ഷേപം അടക്കമുള്ള മറ്റു നിക്ഷേപങ്ങൾക്കു കിട്ടുന്ന ആദായം ഒട്ടും ആകർഷകമല്ലാത്തത് മ്യൂച്വൽ ഫണ്ടിലേക്കു നിക്ഷേപകരെ ആകർഷിക്കുന്നു. മാത്രമല്ല, ഇടയ്ക്ക് ഒന്നുരണ്ടു കാര്യമായ ഇടിവുകളുണ്ടായെങ്കിലും ഏതാണ്ട് പത്തു വർഷമായി ഭൂരിപക്ഷം ഇക്വിറ്റി ഫണ്ടുകളും കൊതിപ്പിക്കുന്ന നേട്ടം നൽകുന്നു. അതിന്റെ മെച്ചം നിലവിലെ നിക്ഷേപകർക്കു കിട്ടുന്നുമുണ്ട്.