അമേരിക്കയുടെ പാർക്കിങ് കിങ്

കേവലം എട്ടു വർഷംകൊണ്ട് 2500 കോടി വാർഷിക വരുമാനമുള്ള കമ്പനി. അമേരിക്കക്കാരന്റെ ദൈനംദിന ജീവിതത്തിലെ അവിഭാജ്യ ഘടകമായി മാറിയ കൊല്ലം അഞ്ചൽ സ്വദേശിയുടെ വേ ഡോട് കോമിന്റെ വിജയപാതയിലൂടെ...

- നോബിൾ എം. മാത്യു

കൊച്ചി നഗരത്തിലേക്ക് പുറത്തു നിന്നു കാറിൽ വരുന്ന ഒരാൾക്കു വാഹനം പാർക്ക് ചെയ്യാൻ എവിടെ സ്ഥലമുണ്ടാകും എന്ന് എങ്ങനെ അറിയാൻ കഴിയും? നിലവിൽ ഒരു രക്ഷയുമില്ല. പാർക്കിങ് സ്ഥലം നോക്കി ഓടിക്കുകതന്നെ. കിട്ടിയാൽ കിട്ടി എന്നു പറയാം. എന്നാൽ അമേരിക്കയിൽ അങ്ങനെയല്ല കാര്യങ്ങൾ. വാഹനം പാർക്ക് ചെയ്യാൻ എവിടെ സ്ഥലമുണ്ടെന്ന് മൊബൈൽ ആപ്പിലൂടെ അറിയാൻ കഴിയും. യുഎസിലെ ഏതു സംസ്ഥാനത്തു ചെന്നാലും ഇത്തരത്തിൽ വാഹനം പാർക് ചെയ്യാനുള്ള ഇടം ഈസിയായി കിട്ടും. കൊച്ചിയിലെ കാര്യം പറഞ്ഞിട്ട് യു എസ്എയിലാണല്ലേ ലാൻഡ് ചെയ്തെന്നു നിങ്ങൾക്കു തോന്നാം. അതിനു കാരണമുണ്ട് യുഎസിലെ ആ മൊബൈൽ ആപ്ലിക്കേഷനാണ് വേ ഡോട്ട് കോം. അതിന്റെ ഉടമ കൊല്ലം അഞ്ചൽ സ്വദേശി ബിനു ഗിരിജ. 2500-3000 കോടി രൂപയുടെ ആസ്തിയുള്ള വേ ഡോട് കോം ഇന്ന് യുഎസിലെ എണ്ണം പറഞ്ഞ മുൻനിര കമ്പനികളിലൊന്നാണ്. കേരളത്തിന്റെ കൊച്ചു ജില്ലയായ കൊല്ലത്തുനിന്ന് അമേരിക്കക്കാരന്റെ ദൈനംദിന ജീവിതത്തിലെ അവിഭാജ്യഘടകമായി മാറിയ സക്സസ് സ്റ്റോറി ബിനു ഫാസ്റ്റ് ട്രാക്കിനോടു പറയുന്നു.

കൊല്ലം ടു അമേരിക്ക

കൊല്ലത്തെ സാധാരണ സ്കൂളിൽ നിന്നു പ്രാഥമിക വിദ്യാഭ്യാസം കഴിഞ്ഞ് ബെംഗളൂരു എഐടിയിൽ നിന്നു കംപ്യൂട്ടർ എൻജിനീയറിങ്ങിൽ ബിരുദം. ആദ്യ ജോലി തിരുവനന്തപുരത്ത് യുഎസ്ടിയിൽ. അവിടെ ചേർന്ന പത്താമത്തെ ജീവനക്കാരനാണ് ബിനു ഗിരിജ. 2001ൽ അമേരിക്കയിൽ എത്തിയതോടെയാണ് ബിനുവിന്റെ ജീവിതം ട്രാക്ക് മാറുന്നത്.