സ്ലീപ് ഡിവോഴ്സ് പ്രായോഗികമോ?

നല്ല ഉറക്കത്തിനായി ദമ്പതികൾ രണ്ടിടത്ത് ഉറങ്ങുന്ന രീതിയാണ് സ്ലീപ് ഡിവോഴ്സ്. നമ്മുടെ നാട്ടിലും ഈ രീതി ട്രെൻഡാകുന്നോ...

- രൂപാ ദയാബ്ജി

ഇൻഫോപാർക്കിലാണ് ദമ്പതികളായ ആദർശും അദിതിയും (യഥാർഥ പേരല്ല) ജോലി ചെയ്യുന്നന്നത്. രണ്ടു കമ്പനികളിലായി ആദർശ് അമേരിക്കൻ ടൈമിലും അദിതി ഇന്ത്യൻ സമയത്തുമാണു ജോലി ചെയ്യുന്നതെന്നതൊഴിച്ചാൽ ഇരുവർക്കുമിടയിൽ യാതൊരു പൊരുത്തക്കേടുമില്ല.

യാത്രയും മ്യൂസിക്കുമാണ് ആദർശിന്റെ ത്രില്ലുകൾ. കുക്കിങ്ങും സിനിമയുമിഷ്ടപ്പെടുന്ന അദിതിക്ക് എല്ലാ ദിവസവും ഒരു സിനിമയെങ്കിലും കാണണമെന്ന നിർബന്ധവുമുണ്ട്.

ജോലിയിലെ ഷിഫ്റ്റ് വ്യത്യാസം പരസ്പരം ബാധിക്കാതിരിക്കാനായി ഫ്ലാറ്റിലെ രണ്ടു മുറികളിൽ ഉറങ്ങുന്ന സ്ലീപ് ഡിവോഴ്സ് രീതിയാണ് ഇവർ കുറച്ചു കാലമായി പിന്തുടർന്നത്. ഷിഫ്റ്റ് കഴിഞ്ഞു വരുമ്പോൾ കോളിങ് ബെൽ അടിക്കരുത് എന്നതു മുതൽ ജോലിക്കു പോകും മുൻപു കിച്ചൻ ക്ലീൻ ചെയ്തിരിക്കണം എന്നതു വരെയുള്ള ഫാമിലി റൂൾസ് ഇരുവരും കൃത്യമായി പാലിക്കുന്നു.

ആഴ്ചയവസാനം അദിതിക്കൊപ്പം സംസ്ഥാനത്തിനു പുറത്തുള്ള തിയറ്ററിലേക്കു വരെ ബൈക്ക് റൈഡ്' നടത്താൻ ആദർശിന് ഒരു മടിയുമില്ല.

കുറച്ചുദിവസം മക്കൾക്കൊപ്പം നിൽക്കാനായി ആദർശിന്റെ അച്ഛനും അമ്മയും എത്തിയതോടെയാണു കാര്യങ്ങൾ പാളം തെറ്റിയത്. അടുക്കളയിലെ റൂൾസ് മുതൽ രണ്ടു മുറിയിലെ ഉറക്കം വരെയായി അവർ കണ്ടുപിടിച്ച “കുറ്റങ്ങളുടെ ലിസ്റ്റ് നീണ്ടു. കല്യാണം കഴിഞ്ഞു രണ്ടു വർഷമായിട്ടും കുട്ടികളാകാത്തത് രണ്ടിടത്തെ ഉറക്കം കൊണ്ടാണെന്ന കണ്ടുപിടുത്തം' അദിതിയുടെ അച്ഛനമ്മമാരെ വിളിച്ചറിയിക്കാൻ അവർ മടിച്ചില്ലെന്നു മാത്രമല്ല, വിവാഹമോചനത്തിലേക്കാണ് ഇവർ നീങ്ങുന്നതെന്നു വരെ പറഞ്ഞുകളഞ്ഞു.

വിശ്രമം മെച്ചപ്പെടാനും കൂർക്കംവലി പോലുള്ള പ്രശ്നങ്ങൾ അതിജീവിക്കാനും സമ്മർദം കുറയ്ക്കാനും ജോലിയിലെ ഷിഫ്റ്റ് വ്യത്യാസം ഉറക്കത്തെ ബാധിക്കാതിരിക്കാനുമെല്ലാം ദമ്പതികൾ രണ്ടിടത്ത് ഉറങ്ങുന്ന രീതിയാണ് സ്ലീപ് ഡിവോഴ്സ്. രാത്രി എന്നും ഒന്നിച്ചു കിടന്നാലേ കുട്ടികളുണ്ടാകൂ... എന്ന പരമ്പരാഗത സിദ്ധാന്തം നിലനിൽക്കുന്നിടത്തോളം 'സ്ലീപ് ഡിവോഴ്സ്' കേരളത്തിലോ ഇന്ത്യയിലോ അംഗീകരിക്കപ്പെടില്ല എന്നുറപ്പിച്ചു പറഞ്ഞാണ് ആദർശും അദിതിയും അവരുടെ അനുഭവകഥ 'വനിത'യോടു പറഞ്ഞത്. അതിനൊപ്പം ഒരു കാര്യം കൂടി പറഞ്ഞു, യഥാർഥ പേര് വെളിപ്പെടുത്തരുത്.