രോഗം പകരാത്ത മനസ്സ്

ശരീരത്തിലെ പകുതി അവയവങ്ങളെയും കാൻസർ ബാധിച്ചെങ്കിലും ചിരിയോടെ ലക്ഷ്മി പറയുന്നു, വൈകിയിട്ടില്ല, ഇനിയുമൊരു സ്വപ്നമുണ്ട്

- രൂപാ ദയാബ്ജി

ആറേഴു വർഷം മുൻപാണ്, കൃത്യമായി പറഞ്ഞാൽ 2019ൽ ബെംഗളൂരുവിൽ അധ്യാപികയായി ജോലി ചെയ്തിരുന്ന ലക്ഷ്മി ജയന് ഇടതുമാറിൽ ഒരു തടിപ്പു പോലെ തോന്നി. കുറച്ചു ദിവസം മുൻപു സ്കൂട്ടറിൽ നിന്നു വീണപ്പോൾ ഇടിച്ചു വീണതിന്റെ കല്ലിപ്പാകുമെന്നാണ് ആദ്യം കരുതിയത്. ഇടയ്ക്കിടെ തലവേദന കൂടി വന്നതോടെ ലക്ഷ്മി ഡോക്ടറെ കണ്ടു.

ശരീരത്തിന്റെ ഇടതുഭാഗത്തെ ഏതാണ്ട് എല്ലാ അവയവങ്ങളെയും ഇന്നു കാൻസർ കവരുമ്പോൾ ഏഴു വർഷം മുൻപുള്ള ആ നിമിഷത്തിലേക്കു ടൈം ട്രാവൽ ചെയ്തു പോകാനായെങ്കിലെന്നാണു ലക്ഷ്മി ഇപ്പോൾ ചിന്തിക്കുന്നത്. അതിനു പിന്നിൽ വേദനയുടെ, ഉറങ്ങാ രാത്രികളുടെ ഒരുപാടു കഥകളുണ്ടു ലക്ഷ്മിക്കു പറയാൻ.

രോഗമില്ലാ കാലം

മാഹിയാണു ലക്ഷ്മിയുടെ സ്വന്തം നാട്. എറണാകുളത്തെ പഠനത്തിനു ശേഷം ബെംഗളൂരുവിൽ അധ്യാപികയായി ജോലി കിട്ടി. ഐടി ആർകിടെക്ടായ ഭർത്താവ് ജയൻ നായർക്കും രണ്ടു മക്കൾക്കുമൊപ്പം ജീവിതം സന്തോഷത്തോടെ മുന്നോട്ടു പോകുന്നതിനിടെയാണ് ആ സംഭവം, ഇടതു മാറിൽ ഒരു തടിപ്പു പോലെ. അതു കണ്ടപ്പോൾ സംശയമൊന്നും തോന്നിയതേയില്ലെന്നു ലക്ഷ്മി പറയുന്നു.

“തടിപ്പു കണ്ടപ്പോൾ വീഴ്ചയുടെ ബാക്കിപത്രമാണ് എന്നേ കരുതിയുള്ളൂ. തലവേദന കലശലായതോടെ അടുത്തുള്ള ഡോക്ടറെ കണ്ടു. മാറിടത്തിലെ തടിപ്പ്, ഫൈബ്രോ അഡിനോമ എന്ന അവസ്ഥയാണെന്നു സ്കാനിങ്ങിൽ മനസ്സിലായി. അപകടകാരി അല്ലെന്നും കാൻസർ കോശങ്ങളില്ല എന്നതുമാണ് ആശ്വാസം. പക്ഷേ, അത് ഒരിക്കലും കാൻസറാകില്ല എന്നു വിശ്വസിച്ചതാണു മണ്ടത്തരം. എട്ടു മാസത്തോളം ആ തടിപ്പുമായി ജീവിച്ചു. അതിനിടയിൽ മറ്റൊരു സംഭവമുണ്ടായി. ഒരു ദിവസം സ്കൂളിൽ പി ടിഎ മീറ്റിങ്ങിനിടെ തലകറങ്ങി വീണു. അപ്പോൾ നടത്തിയ സ്കാനിങ്ങിലും മുഴ ഫൈബ്രോ അഡിനോമ തന്നെയെന്നു കണ്ടു. പക്ഷേ, ഇടയ്ക്കിടെയുള്ള വീഴ്ചകളിൽ എന്തോ പന്തികേടു തോന്നി. രണ്ടു ദിവസം കഴിഞ്ഞു കോട്ടക്കൽ ആര്യവൈദ്യശാലയിലെ ഡോ. സുജിത് വാരിയരെ കണ്ടു. സ്കാനിങ് റിപ്പോർട് കണ്ട അദ്ദേഹമാണു മുഴയുടെ അപകടം തിരിച്ചറിഞ്ഞു ബയോപ്സിക്കു നിർദേശിച്ചത്.

വിളിക്കാതെ വന്ന അതിഥി

കുടുംബത്തിൽ ആർക്കും കാൻസർ വന്നതായി കേട്ടിട്ടു പോലുമില്ല. ബയോപ്സിക്കു വേണ്ടി നാലഞ്ചിടത്തു നിന്ന് എടുത്ത സാംപിളുകളിലെല്ലാം കുഴപ്പമുള്ള കോശങ്ങളുണ്ടെന്നു കേട്ടതോടെ സംശയമായി.