പൂവിതൾ പാദങ്ങൾ

കാൽപാദങ്ങളുടെ അഴകു കാക്കാനും വരൾച്ചയകറ്റാനും വിട്ടിൽ തന്നെ ചെയ്യാവുന്ന പരിചരണങ്ങൾ

- അമ്മു ജൊവാസ്

സുന്ദരമായ പാദങ്ങൾ അഴകിന്റെ അളവു കോലാണെന്നാണല്ലോ പറയുക. ഏതു കാലാവസ്ഥയിലും കാലുകൾ അഴകോടെയിരുന്നാൽ ആരോഗ്യവും നമുക്കു സ്വന്തം. ചൂടും മഴയും കഴിഞ്ഞു ദേ, മഞ്ഞിൻ തണുപ്പെത്തി. തണുപ്പുകാലത്ത് അധികമായി അലട്ടുന്ന വരൾച്ച, വിണ്ടുകീറൽ തുടങ്ങിയ പ്രശ്നങ്ങൾ പരിഹരിച്ചു പാദചർമം മൃദുലവും സുന്ദരമായും വയ്ക്കാൻ സഹായിക്കുന്ന വീട്ടുവിദ്യകൾ അറിയാം.

ശുചിത്വത്തോടെ കാക്കാം

കാൽപാദങ്ങളുടെ ഭംഗി വൃത്തിയാണ്. അഴുക്കും പൊടിയുമില്ലാതെ വരൾച്ചയില്ലാതെ പാദം ഭംഗിയായിരിക്കണമെങ്കിൽ വൃത്തി പാലിച്ചേ മതിയാകൂ. അതിനു സഹായിക്കുന്ന ചില ഫൂട്ട് ബാത്' വഴികളറിയാം. ഇവയിലേതെങ്കിലും ഒന്ന് ആഴ്ചയിൽ ഒരു തവണ ചെയ്യുന്നതു പാദങ്ങൾ വൃത്തിയോടെയിരിക്കാൻ സഹായിക്കും. ഫൂട്ട് ബാത്തിനു ശേഷം പാദങ്ങൾ ബ്രഷുപയോഗിച്ചു മൃദുവായി കഴുകി വൃത്തിയാക്കാം.

ഇളം ചൂടുള്ള വെള്ളത്തിലേക്കു കുറച്ച് ഉപ്പ് ഇട്ടതിനുശേഷം പാദങ്ങൾ അതിൽ മുക്കിവയ്ക്കാം. 20 മിനിറ്റ് വരെ ഇങ്ങനെ വയ്ക്കുന്നതു പാദസംരക്ഷണത്തിനു നല്ലതാണ്.

ഇളം ചൂടുവെള്ളത്തിൽ ബേക്കിങ് സോഡ, ഉപ്പ് എന്നിവ ഇട്ടു പാദങ്ങൾ 15 മിനിറ്റ് മുക്കി വയ്ക്കുക. പാദസംരക്ഷണത്തിന് വളരെ നല്ലതാണു നാരങ്ങ. ഇളം ചൂടുവെള്ളത്തിൽ ഉപ്പും നാരങ്ങാനീരും കലർത്തി അതിൽ പാദങ്ങൾ മുക്കി വയ്ക്കുക. ശേഷം പാദങ്ങളിൽ നാരങ്ങാ കൊണ്ട് ഉരസുക. സുന്ദരമായ പാദങ്ങൾ സ്വന്തമാക്കാം.

ഇളംചൂടുവെള്ളത്തിൽ ഷാംപൂ ചേർത്ത്, അതിലേക്കു നാലുതുള്ളി നാരങ്ങാനീര് ചേർത്തതിനു ശേഷം പാദങ്ങൾ മുക്കി വയ്ക്കാം. 20 മിനിറ്റ് ഇങ്ങനെ വയ്ക്കാം. പാദങ്ങൾ മൃദുവും ഭംഗിയുള്ളതുമാക്കും.

പാദങ്ങൾ പൂ പോലെ

രാത്രി ഉറങ്ങും മുൻപ് മുഖം കഴുകി വൃത്തിയാക്കി മോയിസ്ചറൈസർ പുരട്ടണമെന്നു പറയാറില്ലേ. പാദത്തിന്റെ കാര്യത്തിലും കെയർ റുട്ടീൻ ആവശ്യമാണ്. എന്നും രാത്രി കിടക്കും മുൻപ് പാദം കഴുകി അഴുക്കു നീക്കി മോയിസ്റൈസർ പുരട്ടണം. തണുപ്പുകാലത്തു രണ്ടു നേരം മോയിസ്ചറൈസർ ഉപയോഗിക്കണം.