ഡോക്ടർ ഫാമിലി

നാദാപുരത്തെ സൈന അഹമ്മദിന്റെ ആറു പെൺമക്കളും ഡോക്ടർമാർ.ഒരേ നൂലിൽ കോർത്ത മനസ്സുമായി ഉമ്മയും മക്കളും ഒത്തുകൂടിയപ്പോൾ

- ഡെൽന സത്യരത്ന

എൺപതുകളിലാണു സംഭവം. കോഴിക്കോട് വാണിമേലിനടുത്ത് ഭൂമി വാതുക്കൽ എൽപി സ്കൂളിലെ അഞ്ചാം ക്ലാസുകാരി സൈന വൈകിട്ട് വീട്ടിലെത്തിയപ്പോൾ ഉമ്മ വലിയൊരു വാർത്തയുമായി കാത്തിരിക്കുന്നുണ്ടായിരുന്നു. വാത്സല്യത്തോടെ അവളെ ചേർത്തു നിർത്തി ഉമ്മ പറഞ്ഞു, "അടുത്താഴ്ച അനക്ക് നിക്കാഹാണ്.

പറഞ്ഞുറപ്പിച്ചതു പോലെ വാണിമേൽ പടയൻ കുടുംബത്തിൽ കല്യാണം നടന്നു. പടയൻ അബ്ദുൾ ഹാജിയുടെ മകൾ പതിനൊന്നുകാരി സൈനയെ ടി.വി.പി അഹമ്മദ് കുഞ്ഞഹമ്മദ് കുട്ടി വിവാഹം കഴിച്ചു. അവർക്കുണ്ടായത് ആറു പെൺമക്കൾ. ആറു പേരേയും ഡോക്ടർമാരായി വളർത്തിയെടുത്ത കഥ പറയുമ്പോൾ ഇപ്പോഴും സന്തോഷം കൊണ്ടു സൈനയുടെ കണ്ണു നിറയും. എല്ലാവരും ഒത്തുകൂടുന്ന നിമിഷങ്ങളിൽ ആനന്ദത്തിന്റെ മത്താപ്പു അവിടെ വിരിയും.

ഏഴു മനസ്സുകളുടെ സന്തോഷവും ചിരിയും നിറയുന്ന വീട്ടിലിരുന്ന് ആറു മക്കളും ഉറപ്പിച്ചു പറയുന്നു, “ഡോക്ടറാകാൻ ഉമ്മയോ ഉപ്പയോ ഞങ്ങളെ ഒരിക്കൽപ്പോലും നിർബന്ധിച്ചിട്ടില്ല. അവരുടെ ഇഷ്ടം ഞങ്ങളുടേയും ഇഷ്ടമായി മാറിയതാണ്. ഈ ഉമ്മയ്ക്കും ഉപ്പയ്ക്കും മക്കളായി ജനിച്ചതാണു ഞങ്ങളുടെ ഭാഗ്യം.

ഡോക്ടർ കുടുംബത്തിലെ മൂത്തവൾ ഫാത്തിമ, അ ബുദാബി സായിദ് സൈനിക ആശുപത്രിയിൽ ജോലി ചെയ്യുന്നു. കോഴിക്കോട് കെ എംസിടി ഡെന്റൽ കോളജ് ആൻഡ് ഹോസ്പിറ്റലിലാണ് രണ്ടാമത്തെ മകൾ ഹാജിറ. ഇനിയുള്ള രണ്ടുപേർ ദുബായിൽ ആണ്. ആയിഷ അൽ അറബ് യൂണിറ്റി ക്ലിനിക്കിലും ഫൈസ അൽനൂർ ക്ലിനിക്കിലും അഞ്ചാമത്തെ മകൾ ഹാന ചെന്നൈ ബാലാജി മെഡിക്കൽ കോളജ് ആൻഡ് ഹോസ്പിറ്റലിലും ഇളയവൾ അമീറ മംഗലാപുരം സെന പോയ മെഡിക്കൽ കോളജ് ഹോസ്പിറ്റലിലും ആണ്.

വായനയിലൂടെ വലുതായ കുടുംബം

കല്യാണം കഴിഞ്ഞ് അഞ്ചെട്ടു മാസം കഴിഞ്ഞാണ് സൈന നാദാപുരത്തെ ഭർത്താവിന്റെ വീട്ടിലെത്തിയത്. “ഒരു ചെറിയ പേപ്പർ കിട്ടിയാലും അതിലുള്ളത് വായിക്കാതെ അദ്ദേഹം കളയുമായിരുന്നില്ല. വായന തന്നെയായിരുന്നു ജീവിതം.'' സൈന ഓർക്കുന്നു. “നല്ല ക്ഷമയുള്ള ആളായിരുന്നു. എട്ടും പൊട്ടും തിരിയാത്ത പ്രായത്തിൽ തുടങ്ങിയെങ്കിലും ഞങ്ങളുടെ കുടുംബജീവിതം നല്ലതായിരുന്നു. കളിയും ചിരിയുമൊക്കെയായി എപ്പോഴും സന്തോഷം തന്നെ. ഗൗരവമുണ്ടെങ്കിലും ആറു മക്കൾക്കും നല്ല സുഹൃത്തായിരുന്നു ഉപ്പ.